Celebrando e di 25 aniversario di Camacuri Flag Day Ride na forma grandi

Hopi hende local y internacional riba Bike

ORANJESTAD (AAN): E dia grandi a yega, ora cu Camacuri Harley Davidson Club Aruba a start cu nan tan anticipa Camacuri Flag Day Ride, como un evento special recordando nan di 25 aña di existencia.

   Y e biaha aki, nan a ricibi participantenan tanto di hermana islanan, pero tambe otro paisnan.  El a bira un actividad internacional completo.

   E evento a cuminza Diadomingo y a sali for di e area di Yachtclubnan na final di Bucutiweg.  Na e salida, e president Buchi a hiba palabra y a gradici tur esnan cu den e 25 añanan a sa di sostene, pusha, y sigui hiba e organizacion den e bon caminda.  E tabata contento tambe cu Ministro Endy Croes a haci acto di presencia na e salida.

   Ministro Endy Croes na su turno, a indica cu tur hende conoce e dificultad cu a pasa aden durante 2020 y 2021 debi na e pandemia, pero e biaha aki si tur hende ta contento di mira asina hopi Biker di tanto Aruba, Curacao, Bonaire, Suriname, y di varios estado di Merca participando.

   Tur esey ta engrandece e Camacuri Flag Day Ride y specialmente awor cu nan ta festehando e di cinco lustro.  Ministro Croes a felicita Buchi di ta un persona hopi activo den e organizacion, desde aña pasa caba cu ta traha pa asina haya tur permiso pa e evento.

   “Awe nos ta mira con grandi e evento aki ta,” Ministro a indica.  E ta splica cu hunto tin di engrandece e actividadnan aki aun mas, y a splica cu Gobierno semper lo sostene actividadnan grandi asina.

   Buchi na su turno a indica cu ademas di haci e actividad aki uno cu ta forma un dia di union pa Bikers di Aruba, nan ta haci esaki pa estrecha lazo internacionalmente.  E gruponan cu a bin di Merca, no tey djis pa goza di coriendo rond riba nan Bike, sino ta conoce e isla turisticamente pa asina nan por sigui planea nan futuro viahenan.  Y e ta algo cu Camacuri Harley Davidson Club Aruba ta orguyoso di dje.

   Cu e bunita Ride aki, e organizacion a demostra cu nan tambe ta aporta na turismo y ta contribui na economia di e isla.