De Schatkist Peuter cu tremendo proyecto unda e materia prima ta e creatividad di mayor y yiunan

Pa celebra y honra Dia di Himno y Bandera: --- Juffrouw Tuti gradici y orguyoso!

De Schatkist Peuterschool a celebra Dia di Himno y Bandera cu un actividad sumamente interesante, cu a envolve mayornan y alumno unda nan a traha proyectonan usando, como materia prima, nan potencial creativo, y esaki a resulta den un despliegue di arte manual precioso.

Juffrouw Ruthaine Jacobs, cariñosamente yama “Tuti”, den entrevista cu Seccion den Movecion, a splica lo siguiente: “Mayornan a haya di juffrouw e tarea di traha un proyecto familiar na cas, unda nan a enfoca riba naturaleza, precisamente ‘plantacion’, tambe nos cadushinan cultural y den esaki cada un mayor a haya un cadushi, cu nan mester a traha creativamente utilizando cualkier material recyclable cu nan tin. Nan por a uza carton, cartulina, boternan di refresco, piedra, y tur cos cu por a realza nan proyecto”.

Diahuebs 17 di Maart, a realiza e exposicion na scol, y  un hurado a scoge e proyecto di mas creativo. E hurado ta personanan cu ta biba den cunuco, cu tin transhi, cadushi, etc., den nan cura. Tin mayor cu a uza divi divi y a utiliza catuna y verf esaki, masha leuk mes, e cabesante a menciona.

“Un evento bunita y creativo y mi ta kita sombra pa tur e mayornan cu a participa y cu a contribui pa yuda nan yiuchi realiza nan proyecto. De Schatkits a pasa un dia super leuk y mi kier a gradici tur e mayornan y tur cu a colabora na un of otro manera pa e proyecto aki a bira uno exitoso.  Y gradici DIOS pa duna nos e talento y sabiduria, pa por realiza proyectonan asina bunita”, Juffrouw Tuti a conclui.