Pa discuti y analiza carta cu gobierno a manda nan:
ORANJESTAD (AAN) – Siman pasa Sindicato di Maestro di Aruba “SIMAR” a yama un conferencia di prensa, pa elabora tocante e Kort-Geding cu gobierno a entama contra e sindicato, y e dia ey a convoca un reunion cu henter e veld cu e sindicato ta representa.
Señora Josephine Albertus, presidente di SIMAR, a haci un recuento di e situacion, durante e conferencia di prensa ultimo, ya cu comunidad a sigui e Caso aki, y a corda cu den e sentencia di 2 di Maart, Huez a pidi Gobierno dos cos: uno pa mustra kico Gobierno a haci te cu awo, y dos, a pidi un plan structural pa baha gasto cu por reemplaza e recorte di 12.6%.
Recien SIMAR a ricibi un documento y den cuadro di esaki e sindicato a duna un informacion breve. Albertus a indica cu tur hende por corda cu na aña 2020 gobierno a negocia cu Hulanda y esaki a bay na un manera unilateral y despues cu nan a negocia a bin informa e sindicatonan.
Ora cu gobierno a informa nan, y splica nan cu na momento cu nan a negocia, nan a pone e salario di trahadornan publico como garantia pa asina aki, por fia placa for di Hulanda, y cu ora nan a bisa “garantia” nan a referi na e recorte di 12.6% riba salario.
Josephine Albertus a señala cu si tuma no ta di esaki, ya caba e clase trahador tin dos aña entregando y no tin un fecha tampoco pa sa ki dia esaki lo caba y te ainda e clase trahado ta den incertidumbre.
E lider sindical a sigui bisa cu apesar cu Huez a pidi Gobierno pa traha un plan structural, toch gobierno a opta pa bin Dialuna, cu un documento den cual ainda no ta duna ningun claridad ni ta compromete tampoco na nada cu e clase trahado.
El a agrega cu riba esaki gobierno kier prohibi (pasobra ta lanta Caso contra sindicato) y kier castiga tambe e clase trahado door di manda carta y bise cu lo retene nan salario na momento cu nan kier protesta y exigi su derecho.
Dialuna, como directiva di SIMAR, nan a analiza e documento en cuestion, y lamentablemente den e documento aki no ta mira ningun contra-propuesta di gobierno, nada fiho ni riba e reemplazo di e 12.6% y tampoco riba e parti di SIMAR y SEPPA nan proposicion.
Albertus a referi na un proposicion cu SIMAR conhuntamente cu SEPPA a presenta, na unda nan a pidi pa baha e oranan di trabao ekivalente na 87.4% cu e trahadonan ta cobra. El a agrega cu den e documento aki, lamentablemente SIMAR no ta mira nada concreto, unda gobierno ta bisa cu gobierno ta duna claridad na e clase trahado.
E lider sindical a bisa cu, den cuadro di transparencia, pasobra pa SIMAR transparencia ta hopi importante, nan a publica e documento riba su website, y a mande tambe pa tur medio di prensa, pa asina aki e documento por wordo lesa y analiza, door di e veld completo y henter comunidad.
