Celebracion di 44 aniversario di Departamento di Cultura Aruba

ORANJESTAD (AAN): Diabierna, 30 di September 2022 na JFK Education Center, Departamento di Cultura Aruba (DCA) a tene un dia special di celebracion cu su personal,

recordando su di 44 aña di servicio cultural brindando na Aruba e atencion y promocion na e cultura rico y bibo di nos pais Aruba. DCA ta brinda excelencia y calidad na Aruba pa medio di educacion di arte, proyectonan cultural di diferente indole y promocion di arte en general, sin laga atras e atencion na expresion folklorico y tradicional.

Riba dia 30 di september 1978 Instituto di Cultura Aruba (ICA) a keda institui door di Gobierno Insular di Aruba, bou di guia di Sr. Hubert Lio Booi como e prome director, kende tabatin e tarea di prepara e pueblo Arubano door di stimula asuntonan cultural, tanto riba desaroyo como di promocion den nos comunidad.

Di 1978 – 2007 ICA (Instituto di Cultura Aruba) a fungi como e instituto pa Asuntonan Cultural y for di 2007, ICA a bira loke nos ta awe, esta Departamento di Cultura Aruba, cu ta basa su mes riba e vision y implementacion di e desaroyo di maneho, investigacion y documentacion riba tereno cultural. Desde 2012, señor drs. Siegfried Dumfries a ser nombra como director di DCA.

Den cuadro di e celebracion di 44 aña di existencia y servicio cultural di DCA, na caminda pa celebracion di nos di 9 lustro; a crea un dia special di programa masha interesante mes, na unda director señor Dumfries hunto cu representantenan di Ministerio di Cultura Aruba, a hiba palabra pa conmemora e dia aki y tambe duna gradicimento y regalo na colega Pedro “Chencho” Kelly, kende a haci 30 aña den servicio y ta baha cu pensioen den luna di october.

Despues a tene un exitoso workshop ofreci pa e maestra Thaïs Franken, MSc., titula: “Introduction to Logic Models for Cultural Management”.

E metodo di “Logic Model” ta un metodo hopi uza internacionalmente den maneho di proyecto y desaroyo di investigacion. Despues di esaki a tene un actividad masha dinamico dirigi pa señor Robert Reeberg cu sosten di señora Rubia Bernabela, na unda a haci diferente ehercicio di seso sport y weganan tocante Aruba su historia, cultura y nos idioma Papiamento. Despues di lunch a clausura e dia cu un tremendo workshop creativo pa medio di ATEMOSA, dirigi pa señora Enrita Werleman cu sosten di su ruman muhe señora Dolores Machado. Tur personal di DCA por a traha riba e logo nobo di DCA den forma di mosaic, na unda na final mester a pega esaki riba un banki di cement, cu lo ta bay ta parti di nos proyecto pa futuro. Sigur un experiencia unico cu a pone e personal di DCA den mas animo pa sigui traha den team.

DCA kier a felicita y gradici staf y henter personal di Departamento di Cultura Aruba y tambe tur ex-director, ex-coleganan, personanan boluntario, instancia, fundacion, organisacion y departamentonan cu a traha den cooperacion cu DCA, p’asina nos por a brinda Aruba un trabou den ekipo cu e meta central pa yuda engrandece y garantisa e calidad y exito di tur actividad, cu a ser y ta sigui realisa na bienestar, probecho y desaroyo di henter nos comunidad.

Un danki special ta bay na señora Alice van Romondt, cu a duna su aporte pa por a realisa e programa di celebracion.

Cultura ta central den e desaroyo sostenibel di Aruba, ya cu esaki ta e medio cu ta uni nos pueblo y na unda nos mes como ser humano ta central y ta duna contenido real na arte, cultura, folklore y tradicion di nos país

Biba nos cultura y tur es’nan cu ta sostene grandemente.

Cu Dios por sigui bendiciona nos dushi pais Aruba, p’asina nos por ta realmente e isla feliz cu nos mester ta.

“Pone e Arubiano na altura di su cultura y siñ’e conoce di otro”. -Hubert Lio Booi-

“Gusta loke ta di otro, pero stima y aprecia loke ta di bo”. -Vicente Ras-

Potretnan ta cortesia di Jhon Freddy Montoya