Prome Minister Evelyn Wever-Croes:
ORANJESTAD (AAN): Aruba, den e tempo di recuperacion y rehabilitacion, ta hayando bon noticia tras di otro. Noticianan cu mester yena cada ciudadano di nos pais cu orguyo y alegria pasobra esakinan ta muestra di tur esfuerso cu a wordo haci den dos aña na unda Aruba y mundo completo a lucha pa sali for di e crisis di e pandemia.
Dialuna 3 di October, un biaha mas Aruba ta resalta den un logro hopi importante pa e maneho y vision di exit strategy y ta wordo reconoci internacionalmente. Aruba a gana e premio di ‘Destination Resilience Award’ for di Caribbean Hotel and Tourism Association (CHTA). Esaki ta e prome biaha cu e premio aki ta wordo otorga.
Ta di remarca cu e parada nacional ‘Cende Mecha’ tambe a haya reconocemento como parti di e exit strategy. Dia 26 di februari, 2022, Minister di Cultura Xiomara Maduro y Minister di Turismo hunto cu ATA a organisa, apesar di tur resistencia, e parada di Carnaval ‘Cende Mecha’ y asina Aruba a mustra mundo con Aruba a habri bek haciendo uzo di su forsa cultural. Cu curashi a tuma e desicion aki pasobra pa haci cosnan grandi pa bo pais, mester tin amor y curashi y e confiansa den bo pais cu cosnan lo bay bon y logra e exito cu a visualisa. Aruba a goza di nos dushi Carnaval, sea den dje, na banda, na television of na diferente medionan social.
CHTA ta reconoce e maneho di e crisis y e accionnan y decisionnan dificil cu CrisisTeam a tuma bou di liderazgo di Prome Minister di Aruba. Durante un ceremonia na San Juan, Puerto Rico, Aruba Tourism Authority (A.T.A.) a ricibi e ‘Destination Resilience Award’ for di CHTA.
Prome Minister Evelyn Wever-Croes ta felicita CrisisTeam, Minister Dangui Oduber, Minister Xiomara Maduro, DVG, A.T.A. y AHATA pa e logro importante aki. Pero tambe ta gradici sector publico y sector priva y henter comunidad di Aruba cu den momentonan dificil, a kere den Aruba y a mustra amor incondicional pa Aruba, a coopera cu tur vision, esfuerso y maneho implementa durante e pandemia, y awe Aruba ta ricibi e conocemento internacional aki pa su maneho den e crisis aki.
