Prome minister a bishita Graf von Zinzendorf School

Den cuadro di Dia di Himno y Bandera,

ORANJESTAD (AAN): Diahuebs mainta, Prome Minister Evelyn Wever-Croes a cuminsa su dia bishitando Graf von Zinzendorf School na San Nicolas en conexion cu dia di Himno y Bandera.

   Prome Minister a ricibi un caluroso bonbini den forma di un bunita presentacion di un baile tipico cu e alumnonan a prepara p’e. Tambe e muchanan a mustra Prome Minister obranan di man masha bunita cu nan a prepara pa un feria cu e scol ta bay tin dia 15 di maart pa celebra e dia nacional. Prome Minister a keda impreciona cu e talento artistico y e dedicacion di e muchanan pa cu e dia grandi aki.

   Tabata un mainta hopi ameno, unda Prome Minister a papia riba e importancia di e himno y e bandera, riba e echo di ta un Arubiano, di stima nos dushi Aruba, tene nos isla limpi, stima y cuida nos animalnan, yuda otro y asina percura pa Aruba bay padilanti.

   Na final di e mainta agradabel aki Prome Minister a gradici juffrouw Edith pa e oportunidad di bishita klas 5, un klas di muchanan masha trankil y hopi creativo y a termina cu un mensahe pa e muchanan pa semper haci nan maximo esfuerso pa ta e miho den tur cos. Den nan estudio, deporte, of cualkier area di nan interes pa asina mayan nan ta esnan cu lo tuma posicionnan over den Gobierno y den tur otro sector