CEDE Aruba a lanza su proyecto “Ban Caya” cu lo cuminza dia 10 di September den e distrito di Noord

ORANJESTAD (AAN) – Señor Daniel Tecklenborg, Director di CEDE Aruba, den conferencia di prensa cu a tuma lugar den Centro di Bario Noord, a duna informacion tocante e proyecto “Barionan Unico”.

Tecklenborg a indica cu CEDE Aruba ta un organizacion di desaroyo cu ta financia proyectonan di comunidad, nan ta yuda cu fondo, cu “capacity building”, networking treciendo organizacionnan hunto, y tambe ta ehecuta proyectonan activo den e comunidad.

Diadomingo 27 di Augustus, den e conferencia di prensa aki, a lanza e proyecto “Ban Caya” y un di e metanan di CEDE Aruba ta pa sostene iniciativanan di bario, y pa e motibo aki a cuminza cu e proyecto “Barionan unico” cu ta carga sosten di gobierno di Aruba, y diferente fondo pa yuda colabora cu e comunidad pa barionan sano.

Tecklenborg a bisa cu e ultimo lunanan CEDE nan ta hopi activo yudando e centronan di bario rond di Aruba pa recluta personal, pa yega na plannan pa actividad. Comunidad lo mira diferente programa den e centronan di bario, y e dia aki nan ta na Noord cu ta centro di e proyecto “Ban Caya”.

E fecha cu comunidad tin cu reserva den su calender ta dia 10 di September cu ta e dia cu ta cuminza cu e proyecto Ban Caya.

Seguidamente, señora Bermudez, coordinador di e programa Barionan Unico a splica cu e meta di e proyecto Ban Caya, ta reactiva y rebiba e barionan, unda tur hende ta bin hunto pa pasa un dia cu nan sernan keri, conoce nan bario, y tur organizacion cu ta traha den nan bario, ki deporte ta existi eynan, y tambe kizas conoce nan bisiña.

E idea tambe ta pa continua cu ciclovia cu IBiSA a organiza hopi, trece e habitantenan hunto y crea “Ban Caya” y tambe pa e residentenan por mustra kico nan por brinda den e bario. Nan a scoge pa cuminza den e Bario di Noord, y ta conoci, door di CBS cu e ta un bario cu tin un poblacion hopi grandi, tanto adulto como hobennan. Bermudez a pidi pa keda pendiente di dia 10 di September, dia 10 di September di 7 or pa 3 or, y tur hende ta bon bini.