*Parlamento no ta bay acepta algo cu ta mina Aruba su autonomia y mas!
ORANJESTAD (AAN) Parlamentario Ricky Hoek a señala cu no solamente e COHO tabata deal e forma di pago back, pa loke ta e 916 miyon Florin cu Hulanda a fia Aruba durante e temporada dificil di Covid-19, pero tabata e COHO y e RAft. Tur dos, den e proceso di paga back, no ta e manera mas facil ni mas sincero cu Hulanda a propone pa e Islanan. Y mirando cu e COHO a worde bati for di mesa Aruba a keda cu e RAft.
“Ainda esey riba e Isla, ta un estorbo pa nos, pasobra na ningun momento Parlamento a aproba e RAft cu tin riba mesa. Den pasado Aruba a manda un cantidad di pregunta na Tweede Kamer di Hulanda, puntrando pakico e RAft aki mester a bin? Di con precisamente mester a bin den un Rijkswet y no den un Landsverordening, den un otro forma cu ta den e Constitucion local, caminda nos mes por regla e pagonan na Hulanda? Kico ta e condicionnan bao di cual Aruba mester paga bek? Kico mas e ta encera y den cuanto tempo nos mester paga bek?” Parlamentario Ricky Hoek a señala.
El a sigui splica cu Hulanda te dia di awe no por a duna un contestacion riba e preguntanan cu Parlamento di Aruba a haci; y esaki ta keda primi y hinca Aruba den un incertidumbre, unda cu Parlamento di Aruba no por tuma un decision final, y ta keda pidi Hulanda pa duna contestacion riba e preguntanan aki.
Hoek a menciona cu durante e reunionnan di IPKO, tanto aña pasa cu e aña aki, e tema di RAft ta keda bin dilanti pero ta parce cu Hulanda ta nenga of no tin oido pa loke Parlamento di Aruba ta trece dilanti. Den e caso aki, Hoek a subraya, Parlamento di Aruba ta boga y ta pidi pa para y no bin cu un Rijkswet pasobra esaki no ta conveniente pa Aruba.
El a señala cu si mira e forma con Sint Maarten y Curacao a haya un Rijkswet ora nan a bira independiente na 10-10-10, y despues, nan a haya un exoneracion di pago di tur nan debenan, pero cu Aruba no ta papia di exoneracion y tampoco ta habri pa papia di un refinanciamento na porcentahenan mas abao, cu si a duna Curacao y Sint Maarten.
“Mi ta kere esaki ta factornan pakico nos ta contra un Rijkswet. Nos mester ta cla si, cu nos kier paga nos debe, nos ta dispuesto pa hacie y nos tin presupuesta tambe esaki, pero e mester ta na un manera beneficioso cu ta yuda nos na Aruba. Nos no por tuma un Rijkswet cu ta hinca nos pueblo den un situacion cu nos ta perde nos autonomia, nos ta mina autoridad di Parlamento unda cu mañan ta Hulanda, Tweede Kamer, ta esun cu ta bay dicidi kico nos ta haci, den nos situacion financiero. Mi no ta kere esey ta e miho cu nos ta desea pa Aruba. Pesey nos ta bringa y nos ta pidi pa nos tin un solucion. Pa Gobierno di Hulanda y Tweede Kamer duna un contesta mas pronto posible na e preguntanan, pa asina Parlamento di Aruba sa cual direccion nos ta sigui; con nos ta bay. Si October 2023 yega y nos no tin un soluciona ainda, nos lo tin cu bay pensa hasta den un refinanciamento di e debe aki. Nos no sa ainda tampoco si Hulanda ta habri pa esaki. Pesey nos ta pidi Gobierno pa sigui negocia, pa nan por haya prome e contestanan di Parlamento, kico nan ta pensa riba e preguntanan cu Parlamento di Aruba tin, si nos por haya un porcentahe mas abao y sin otro formanan kizas, cu nos por paga nos debenan” Parlamentario Ricky Hoek di fraccion di MEP a conclui.
