Caya Jose Maria ‘Jo’ Dania a bira un realidad na Dakota

ORANJESTAD (AAN): Den presencia di famia, amigonnan y habitantenan di Dakota, a inaugura oficialmente

Caya Jose Maria “Jo” Dania, anteriormente Shimarucustraat. Cu e cambio di nomber aki, memoria y legado di Jo Dania ta keda conecta pa semper cu e bario cu durante hopi aña e tabata forma parti di dje.

   E acto tabata un momento special pa famia Dania y pa comunidad di Dakota. Diferente persona cu a conoce Jo a comparti nan recuerdonan di un hende cu tabata profundamente conecta cu su bario, su hendenan y historia di Aruba.

   Mirto Lacle a papia di e gran cantidad di conocemento y recuerdonan cu Jo tabatin. Durante varios aña, Jo a forma parti di e proyecto Rescate di Memoria, caminda su historia, anecdotanan y conocemento di tradicionnan di antes a ser registra pa nan no bay perdi.  El a relata con tabata combersa cu Jo semper tabata trece algo nobo. Un recuerdo tabata habri porta pa otro, y hopi biaha Jo tabata laga algo atras pa sigui busca, investiga y despues bolbe cerca dje. Asina, Jo a aporta na conservacion di un parti importante di memoria di Dakota y di Aruba, cu awor por sigui pasa pa siguiente generacionnan.

   Marlon Sneek, Presidente di Parlamento, tambe a comparti recuerdonan personal di Jo y di famia Dania. El a recorda Jo como un hende cu semper tabatin un palabra di aliento y cu su cas y famia tabata forma parti di e ambiente di Dakota. Sneek a recorda tambe e tempo di Tumba, ora comunidad tabata reuni y sali pa sostene Ito Dania.

   Pa Sneek, e cambio di nomber di Shimarucustraat pa Caya Jo Dania ta un momento di orguyo pa Dakota. E a expresa su satisfaccion di por a aporta pa e iniciativa bira realidad.

   Durante su palabra, Prome Minister Mike Eman a recorda cu ya na 2017 Conseho di Minister a aproba e decision pa duna e caya aki nomber di Jo Dania. Awe, Gobierno por a cumpli cu e compromiso aki cu famia Dania y cu comunidad di Dakota.

Prome Minister a destaca cu e reconocimento no ta trata solamente di pone nomber di Jo riba un caya. Su bida tambe ta recorda nos e balor di convivencia y solidaridad cu durante generacion a caracterisa nos comunidad.

   Pastoor Jairo Maduro a destaca importancia di tene e generacionnan anterior como ehempel pa esnan cu ta bin despues. A pesar cu mundo y manera di biba ta cambia, e valornan cu e grandinan a siña nos, manera respect, disciplina, fe y amor pa otro, ta keda importante.  E pastoor a haci bendicion pa Caya Jo Dania, pa famia Dania, pa tur habitante di e caya y pa henter comunidad di Dakota. Su deseo ta pa e bario sigui biba manera un famia, cu respect y aprecio pa otro. Despues di e bendicion, e nomber nobo a ser desvela oficialmente.