Fundacion Baranca di Refugio di Curacao

Mayra Hooi ta splica:

ORANJESTAD (AAN)-- Den entrevista cu DIARIO, Mayra Hooi, di Fundacion Baranca di Refugio, di Curacao, a duna di conoce cu nan tin un evento special pa Aruba.

   “Bao di e fundacion aki nos tin un drama musical cu yama ‘Fiesta den Cunucu”, unda cu nos ta bay actua den un forma masha chistoso, yen di colorido, caminda cu e muchanan por mira bestianan cu nan conoce cu ta den mondi. Esaki nos ta hacie pa purba yega mas cerca di e muchanan door cu nos ta uza e sapo, e cacho, e gai, e galiña, anto conta nan un drama cu ta erg spiritual, unda cu e muchanan por conoce e amor y e pordon di Dios”, Hooi a relata.

El a sigui splica cu nan a yega di bin Aruba un biaha caba, y esey tabata binti aña pasa. E tabata un drama musical titula ‘E Palacio di Gracia’. Esaki a inicia for di Argentina. “Pasobra mi tabata na Argentina den e temporada ey, y nos a siña con pa haci drama, special p’e haya atencion di mucha. Pa motibo cu e muchanan cada bez cu bo ta conta nan un cuenta of un storia, nan no ta sinta keto, nan ta lanta bay. Pero den esaki bo ta bay haya bo cu 35 actor riba escenario y variedad di colorido, y cosnan cu ta comun pa e muchanan”, Mayra Hooi a duna di conoce.

El a menciona cu temponan atras bo tabata mira djis un drama sin e costume, e trahenan di e bestianan cu ta atrae e muchanan.

“Y awo, nos ta haciendo esey pa hala atencion di e mucha anto pa cont’e algo cu lo bay yuda den su bida. Esey ta, mas of menos, algo chikito di e drama musical”, Mayra Hooi a señala.

El a agrega cu no ta solamente pa siña e parti spiritual, pero tambe pa siña norma y balornan of pa repasa nan, pasobra den e show aki tin un personahe di strawberry.

“Y e  strawberry aki ta un fruta y nos ta siña nan atravez di un strawberry y no un hende para, cu e mester come fruta y berdura  p’asina e crece bon, y haya e forza manera papi y mami. Nos kier siña nan tambe di bon manera, ‘con bay tanchi? ‘con bay tio? Kiermen usando dos palabra. Nos kier siña nan tambe cu si un mucha no ta bin cu pan na scol, comparti. Ban yuda otro, y no keda sin comparti, tente, pasobra e ta pober, no tin cen, e no a bin cu pan”, Mayra Hooi a relata.

E show di mucha aki lo ta di 9 pa 16 di October awo, den Centro di Bario Savaneta.