Gos Oduber ta anuncia:
- Na Renaissance Conference Center
ORANJESTAD (AAN)- Den conferencia di prensa e siman aki, señor Gos Oduber, a haci un anuncio di suma importancia, tanto pa Grupo Betico como pa e comunidad en general.
Señor Gos Oduber a expresa cu nos ta yegando fin di aña, cu ta e celebracion di mas grandi di Aruba, unda tur hende ta celebra e fiesta di Fin di Aña, y Aruba ta celebre semper na un manera special. El a indica cu dia 5 di November venidero, Grupo Betico tin un Concierto grandi titula “Nostalgia di Fin di Aña”, cual lo tuma lugar na Renaissance Conference Center, unda cu nan lo ta dunando un presentacion, pero no unicamente un presentacion pasobra Grupo Betico por wak’e regularmente, ta toca rond tambe, pero semper cu e ta presenta un Concierto e ta algo totalmente diferente.
“E no ta djis yega toca mescos cu nos ta toca tur caminda, berdad semper nos ta toca cu yen di energia, pero ora nos ta pone concierto e nivel, no solamente di musica, pero tur loke tin rond di dje, ta hopi mas halto. Ta inverti placa berdad, pa hacie, pero e ta algo diferente; e ta algo apart. Esnan cu a yega di presencia conciertonan di Grupo di Betico, den pasado, por ehemplo den celebracion di 40, 50, 55 aña y recientemente, locual nos a presenta den e Concierto di Juan Luis Guera e tabata algo apart, no ta loke bo ta haya tur dia di Grupo di Betico, y esaki lo ta algo ainda mas grandi, pasobra nos ta bay duna un presentacion. Nos ta bay presenta nos cancionnan cu nos a lanta cu ne”, Gos Oduber a señala.
El a agrega cu e biaha aki nan kier laga pueblo sinti e “Nostalgia” cu tur a lanta cu ne, e musica y e bunita recuerdonan cu Grupo Betico tin di e musica di e temponan aya.
“Nos ta den full training caba, basta intensivo, pero e idea ta pa nos ta completamente cla pa duna un bunita presentacion. Y mi tin cu bisa cu Grupo di Betico, nos ta 58 aña leu di existencia di e grupo, y mi tin cu bisa cu el a bira parti di nos tradicion. Grupo di Betico ya no ta solamente un grupo pa entretenimento, pero mas bien el a bira parti di nos cultura, e ta parti di nos, dus, ken cu bo puntra over di Fin di Aña, nan a bisa bo directamente cu no tin u fin di aña sin Grupo di Betico”, Gos Oduber a expresa.
