Caya di Rotonde Noord bay pabao honra na Pedro ‘Charro’ Kelly

Develo di borchi

ORANJESTAD (AAN): Recientemente den oranan di atardi, un ceremonia a ser teni net panort di rotonde di Noord, na momento cu Gobierno a honra dos ciudadano fayeci, cu develo di nomber di caya, pa tanto e caminda di Rotonde bay pariba direccion Kudawecha, y e caminda di Rotonde bay pabao direccion Palm Beach.

   E honor a bay pa Charro Kelly (d.f.m.), y tambe Felix Flanegien (d.f.m.)  Famianan di ambos politico tabata presente e atardi aki.

   Gobierno a honra e peticion pa cambio di nomber di caya, pa e dos personanan aki cu semper a traha na bienestar y progreso di Aruba.  Y awor merecidamente dos caya ta carga nan nomber.

   Gobierno ultimo añanan a cambia e maneho di nombra cayanan na baluartenan, y esaki pa no haci e aspecto logistico mucho complica.  E caya ta keda mantene su nomber cu e tin oficialmente, pero esun cu ta bay pariba ta na honor di Felix Flanegien, y esun bay pabao rumbo Palm Beach ta na honor di Pedro ‘Charro’ Kelly.

   Prome Ministro demisionario Evelyn Wever-Croes a splica cu tanto Charro y Felix ta personanan hopi conoci den comunidad, y el a relata biografia di Charro Kelly.

   Pedro Pablo Kelly, mihor conoci como Charro, tabata un politico y a bira Ministro di Obranan Publico y Utilidad na 1986 y 1987, y tabata Ministro pa Obranan Publico y Salubridad na 1989 te 1993.  Den e gobierno di coalicion ey, Charro tabatin funcion di Vice-Prome Ministro tambe.

   Den decada di 1970 el a cuminza su carera politico den Partido MEP, unda el a forma parti di directivo.  E tabata miembro di Conseho Insular Arubano di 1975 te 1985, y a fungi tambe como Diputado den e Colegio Ehecutivo di Aruba di 1977 te 1983, y despues na 1985.  Na 1983 e tabata pa un periodo cortico, ocupando e funcion di Gezaghebber Interino.  E mesun aña el a lanta su mesun Partido ADN hunto cu Pedro Bislip y John Booi.

   Cu entrada di Status Aparte na 1 Januari 1986, el a bira e 1er Ministro di Obranan Publico den Gabinete Eman I.  El a ocupa e funcion aki te Augustus 1987, ora cu ADN a retira su sosten di e coalicion.  Despues di e periodo di un aña y mey ey, el a bira hopi conoci como cu e tabata e Ministro cu mas a dedica pa pone asfalt riba mas hopi caminda di santo rond di Aruba.

   Entre 1988 y 1989, e tabata Parlamentario, y di 9 Februari 1989 te 3 di Maart 1993, e tabata Ministro di Obranan Publico y Salubridad den Gabinete Oduber I.  Charro Kelly tabata lider di partido di 1987 te 2001 ora cu ADN a bira inactivo y e mes a retira di politica.

   Charro tabata casa cu Clothilda Dijkhoff, y ta tata di yiu muher y yiu homber.  Pa su meritonan tambe, el a keda condecora como Ridder in de Orde van Oranje Nassau.

   Tanto Felix Flanegien y Charro Kelly tabata dos baluarte cu semper a pone Aruba dilanti, y a hiba nan distrito di Noord dilanti.  Nan ta keda goza di aprecio enorme pa loke nan a haci pa e isla.