Jessy Ras hopi orguyoso di e 12 hobennan cu a finaliza prome etapa di SVT

ORANJESTAD (AAN) – Jessy Ras, Coordinador di SVT (Social Vorming Traject) of Trayecto di Formacion Social,

ta hopi contento cu 12 hoben a finaliza nan trayecto, despues cu nan a cuminza dia 19 di Augustus. A cuminsa cu 13 pero un a cay afo.

            “Pero mi ta super contento si, cu e 12 aki a persevera y a demostra cu nan por”, Jessy Ras a bisa.

            El a expresa palabranan di pabien na e hobennan, nan mayornan y na pueblo di Aruba. Esaki ta un proyecto cu Gobierno di Aruba y Gobierno di Hulanda ta sostene, desde su inicio.

            E hobennan aki ta bay over na e siguiente fase, den cual nan ta core stage, y na Augustus otro aña nan ta termina e trayecto completo.

            Esaki ta e grupo 18, y ta bay haci 13 aña cu a cuminza cu e prome grupo y durante e añanan tin hopi cambio a sosode den e hobennan, segun Jessy Ras. Ya despues di tres siman ta cuminza wak cambionan den e hobennan, pasobra e ta un trayecto, vooral e prome parti, hopi intensivo.

            Nan ta traha den team tambe, y por ta sigur cu e hobennan cu ta finaliza a siña hopi, y tambe esnan cu no a caba. Ta bunita pa wak con orguyoso e hobennan cu ta finaliza ta sinti di nan mes, Ras a comenta. Por wak den nan e cara di orguyo y nan famianan tambe ta hopi entusiasma y emociona, pasobra nan yiu a logra, Jessy Ras a subraya.