Exitoso prome evento di Caribbean Culture Motorshow

ORANJESTAD (AAN): Recientemente e organizacion local di Caribbean Culture Motorshow

a tene un evento cu a bira un show di e.o. diferente auto y jeep cu ta pertenece na ciudadanonan di Aruba.

   E evento aki a tuma lugar na Kooyman y D22 for di 3’or di atardi te cu 8’or di anochi. 

Tabatin musica di DJ Alvin, varios Snacktruck, y tambe evento di Hotwheels organiza pa Tire Cayente.

   Na e evento aki, tur tipo di auto, vehiculo, y motorcycle tabata permiti pa participa.  Y publico a acudi masalmente pa e atardi y anochi placentero aki.

   Ayckel Koolman a splica cu nan a haci e evento pa purba na uni tur grupo di e.o. Jeeps, Classic Cars, Muscle Cars, JDM, y hasta autonan di careda remote-control, etc., y aprecia tur e tipo di modificacion (yama tambe “build”) cu tin na Aruba.

   E idea ta pa organiza Caribbean Culture Motorshow un evento di tur aña, y kizas na otro lugar pa atrae mas.

   E co-organizador Giandre Williams a splica cu e show a wordo organiza como un sorto di union, y alavez ta un chens pa mustra publico con nan dos por hinca un proyecto den otro, y present’e como show.  Asina ta trece tur hende hunto pa aprecia e pasion di publico den e cultura di auto, vehiculo, brommer, dragrace, y tur cos cu tin di haber cu motor.