ORANJESTAD (AAN): Keto bay tin hendenan sin cuero di cara cu no ta ni preocupa si acaso nan wordo descubri di ta un “con-man” sin consenshi,
y ta bin cu storia y gana confianza di victimanan, djis pa por horta placa.
Y e placa cu nan ta horta, ta loke ta wordo duna di buena fe pa yuda esnan den comunidad cu mas tin mester.
En corto, loke ta pasando ta cu tin algun hende ta canando rond e dianan aki ta buscando “donacion” cerca algun Comerciante, y na forma falso ta gañando cu nan ta pidi placa pa yuda Fundacion Pa Nos Comunidad.
Esey ta loke Liandro Loopstok a denuncia e siman aki, y ta haci un peticion urgente pa publico en general, y principalmente comerciantenan ta alerto riba e triki di algun persona sin escrupulo, cu ta purba di haya placa facil asina.
Directiva di Fundacion FPNC a haya sa di esey, danki na comerciantenan cu a haya e peticion aki raro pasobra e no ta cana e caminda normal di costumber.
Segun Loopstok, semper Fundacion FPNC ta acerca e companianan na diferente manera, pero semper ta inclui un carta oficial, of un email cu ta bin sea for di miembronan e.o. Genaika van der Brezen of for di Liandro Loopstok mes.
Si acaso Genaika of Liandro mes no por haci esey, di antemano nan lo notifica e compania di esey pa asina mustra cu tur cos ta legal.
CAMPAÑA FALSO: Segun Fundacion FPNC a bin haya sa, cu tin algun persona cu ta canando rond den comunidad cu e suplica pa haya yudanza, y ta gaña cu cara seco cu nan ta haciendo esey pa Fundacion Pa Nos Comunidad, siendo cu nan no tin ni arte ni parte, y kizas no sa e adres mes di FPNC.
Segun Loopstok, nan ta lamenta loke algun hende ta haciendo, como cu Fundacion FPNC tin su tarea pa constantemente produci pakete di comestible pa yuda e ciudadanonan sali for di e crisis aki y pa nan para bek riba nan pia. Y awor ta confronta e situacion descabeya aki di hendenan sin escrupulo, ta desanima esnan di FPNC.
Un investigacion a cuminza pa haya sa tur detaye di loke ta pasando, y unda ta e adresnan cu e personanan sin cuero di cara a pasa busca yudanza y gañando hende cu nan a bin di Fundacion FPNC.
ALERTA NA PUEBLO: Liandro Loopstok semper ta aprecia y agradecido na tur comerciante cu semper ta duna nan un man pa asina yuda comunidad. E ta un aprecio enorme cu nan tin pa nan.
Pero aworaki, Fundacion FPNC ta desea di alerta pueblo y tambe comerciantenan, pa corda cu semper e unico forma cu nan ta acerca pa haya donacion ta pa medio di un carta of email oficial, y e unico personanan cu por pasa ta Liandro, of e Directora Genaika, of un miembro di directiva of persona autoriza. Pero semper di antemano lo duna detaye ta ken lo acerca e compania.
Loopstok a bisa cu constantemente nan mannan ta habri pa haya donacion. Mas donacion nan haya, esey nifica cu ta mas hende y famia nan por sigui yuda, y di e forma ey e fundacion ta sigui draai.
Fundacion FPNC a haya un espacio mas grandi, unda nan por cumpli mihor cu e protocolnan di DVG y reglanan sanitario. Nan ta awor na Sero Blanco 14-A y ey ta ricibi donacionnan.
