Casi un miyon di pildora falso contra presion a wordo confisca na Santo Domingo

Contrabandistanan tabata exporta nan pa otro islanan den Caribe

ORANJESTAD (AAN): Si acaso den bo cashi di remedi bo tin algun remedi, pildora, of paki di medicina pa malesa cardiovascular procedente di Republica Dominicana, e chens ta grandi cu e no ta contene nada di remedi aden!  E ta djis falso, y kizas ta consisti djis di sucu y demas substancia cu ta yuda cu nada.  Pues bo ta tumando remedi contra presion halto, sin ningun efecto!

   Den fin di siman a wordo anuncia cu den varios accion y razzia teni na Republica Dominicana, autoridadnan a logra di confisca casi un miyon di pildora y remedi contra presion di sanger, pero cu ta completamente falso.  Cuerpo Special di Control di Combustible y Comercio di Mercancia (Ceccom) a haci esaki, hunto cu demas autoridad legal.

   E pildoranan tabata empaketa den cahanan cu diferente logo di companianan di remedi Dominicano y tambe di exterior reconoci.

   Ademas di e pildoranan aki, nan a confisca tambe 3 ton di materia prima, equipo, y documento cu nan ta usa pa fabrica y empaketa e remedinan falso aki.

   Nan a confisca dos arma di candela tambe di diferente caliber, algun cartucho.  Tambe a haya 76 tanki, 86 caha yena cu pildora, y 34 machine cu nan ta usa pa mezcla, yena, pisa, y pone nan den paki di foil, y imprimi ticket riba nan.

   E razzia a wordo haci simultaneamente na diferente cas y negoshi den area di Santo Domingo Este, y tambe na Santiago.

   Gobierno Dominicano a indica cu e bataya y e dolor di cabez cu nan tin contra remedinan falso aki, y bendemento clandestino di cosnan aki cu por ta peligroso pa salud di hende, lo sigui.  Pasobra a descubri cu algun di e machine pa ‘mezcla’ ta cosnan barata cu no ta mezcla e remedi bon.  Pues tin chens cu bo ta guli algo cu ta full desbalanza y por perhudica bo salud.

   Lo investiga tambe di con ta net cu pildora pa presion di sanger a dicidi na fabrica asina cos falso.