Ing. Marlon Croes di DOW, ta informa:
ORANJESTAD (AAN)—Departamento di Obranan Publico (DOW) a yama un conferencia di prensa, den cual su director, Ing. Marlon Croes, a duna informacion tocante e ultimo desaroyonan di e construccion di e rotonde na Palm Beach.
Ing. Marlon Croes a expresa cu manera el a informa durante e dos prome ruedanan di prensa, a yega na un punto cu tin cu cera e cruzada por completo pa dos dia pa haci e trabao di ponemento di asfalt den e rotonde.
E trabaonan aki ta programa pa termina dia 8 y 9 di September aki, kiermen otro siman Diahuebs cu Diabierna. Lo inicia cu ceramento di e rotonde dia 8 pa 12 or di mey anochi, kiermen 00’or.
Croes a agrega cu diferente trabao lo wordo prepara pa haci e superficie, unda cu autonan ta core caba, limpi.
Pa asina nan pone azeta bek riba dje, unda e prome truck lo yega entre 6 pa 7 or di mainta pa nan cuminza asfalta pa 12 ora largo, y si ta necesario atardi pa 6’or of 7’or di anochi, unda despues e ekipo ta bay sigui cu trabaonan den oranan di anochi, pa pone e marcacionnan riba caminda pa asina caba den curso di diabierna 9 di September, pa 3 or di atardi.
E rotonde lo habri bek dia 9 di atardi pa anochi, unda cu e buitenband so lo wordo habri, pa motibo cu tin trabaonan cu lo tin cu sigui tuma lugar, den e isla meymey di e rotonde aki, y esey ta pa garantiza e seguridad di e trahadornan cu ta haci e trabao eynan. Asina Ing. Marlon Croes, ta splica.
DOW lo sigui haci e trabao pa termina e rotonde aki, hunto cu Arubaanse Wegen Bouw, cu e meta cu dia 23 di September por finaliza e trabaonan por completo pa uso completo.
