Bisando ayo na Pullmantur Horizon
ORANJESTAD (AAN): Den final di decada di 1990 y drentando pa aña 2000 e tabata usa Aruba como “Home Port” pa turistanan subi y na final baha ora cu e barco Celebrity Horizon tabata nabega den parti zuidwest di Caribe.
E barco Celebrity Horizon tabata sali for di Aruba y bishita e.o. Cartagena (Colombia), Puerto Limon (Costa Rica), y Colon (Panama) pa admira e entrada di Canal di Panama.
Mayoria di e turistanan aki tabata viaha cu e.o. Air Aruba pa yega e isla, y subi e barco pa asina start nan viahe. Pero na momento cu Gobierno a laga Air Aruba bati bancarota, mesora Celebrity Cruises a hay’e obliga na move Celebrity Horizon pa un otro lugar y asina Aruba a perd’e como ‘Home Port’.
E barco MV Horizon desde 1990 te cu 2005 a nabega cu e nomber ‘Celebrity Cruises’. Pero na 2005 el a cambia su nomber pa ‘Island Star’, di e compania Island Cruises.
Pero na 2009 el a wordo tuma over pa e compania spaño Pullmantur Cruises, cu a tuma Horizon over y a dune e nomber di ‘Pacific Dream’. Pero di 2010 en adelante el a bira conoci como Pullmantur Horizon, y di 2012 te cu 2017 a bira conoci como L’Horizon di Croisières de France, pero di 2017 te cu 2020 a bira bek Pullmantur Horizon.
Den fin di siman a drenta e informe tristo, cu Pullmantur a tuma decision cu nan ultimo barco cu ainda tabata existi, lo wordo destrui. Pullmantur Horizon tabata mara pa dos aña caba na un waf na Grecia.
E barco awor a sali rumbo pa Turkia, unda e lo yega na e famoso lugar unda barconan ta bay pa wordo destrui, pa asina recupera tur hero bieu.
Awor cu ta desmantela M/V Horizon, henter e flota di Pullmantur a stop di existi. E excepcion ta Pullmantur Zenith, cu a bandona e compania un poco prome cu pandemia a start, y cu ta aworaki mara inactivo na un waf na Medio Oriente.
Pullmantur tabatin e barconan, esta Pullmantur Sovereign, y tambe Pullmantur Monarch di cual e ultimo aki tambe a usa Aruba como ‘Home Port’. Avionnan Boeing 747 tabata yega for di Madrid te na Aruba, yen-yen di pasahero cu tabata pasa bay direct pa subi e barco. Na final tambe, e turistanan ta baha di barco y subi avion mesora pa regresa Madrid. Ta hopi Arubiano a yega di haci uso di prijs special pa nabega riba Pullmantur Monarch.
Ora cu Pullmantur a bati bancarota na Juli 2020, e barconan Sovereign y Monarch a wordo bendi tambe pa wordo destrui y bendi como hero bieu.
E barco Pullmantur Horizon a wordo fabrica na 1990 y tabatin espacio pa 1.354 pasahero. Awor e tey solamente riba potret y video cu pasaheronan a saca abordo.
