Cas di Cultura y EduCampus a firma un MOU

ORANJESTAD (AAN): Dia 4 di augustus 2021, Stichting Schouwburg Aruba, esta Cas di Cultura y Fundacion Innovation Campus for Education Aruba, esta EduCampus a firma un MOU den cual nan intencion pa traha hunto a wordo declara.

EduCampus ta un forma di scol nobo, den cual alumnonan di entre 8 pa 18 aña ta disfruta di educacion basico te cu educacion secundario na nivel di "High School", di un manera personalisa.

E filosofia y modelo di educacion ta basa ariba e desaroyo personal, social-emocional y cognitivo hunto cu desaroyo di talento den forma di deporte, arte, creacion y abilidadnan di siglo 21. E meta di e modelo ta pa saca e mihor talento y gusto di un alumno cual ta motivele hopi mas pa siña en general y forma studiantenan cu por forma parti activamente di e comunidad cu nan ta parti di dje den un forma sostenible, pero tambe cu base necesario di formashon pa posishona nan mes ariba tarimanan global. 

EduCampus ta brinda su "core curriculum" a base digital, sinembargo tur alumno ta haya coaching di diferente professional den cada materia pa asina por logra metanan estableci conhuntamente cu studiante y mayor.

Pa aña escolar 2021-2022 EduCampus lo ocupa e espacio unda Da Vinci Academy tabata situa, banda di Vondellaan, y tambe lo comparti'e cu e fundacion Creative Arts Aruba cu ta duna les di teatro y actuacion di camera, pues un otro combinacion interesante. Durante e aña escolar lo haci esfuerso pa busca forma con e scol por haya su localidad permanente riba e tereno di Cas di Cultura durante y despues di renovacion. Tin plan pa esaki bira di un manera inovativo y multifunccional.

Den curiculo di EduCampus e materianan di arte (musica, baile, arte visual y teatro), deporte y abilidad di uzo diario di idioma por wordo scohi door di e alumnonan pa cada semester. E curriculo di arte a wordo desaroya conhuntamente cu Cas di Cultura y ta enfoca ariba e desaroyo artistico y cultural, segun e necesidad y interes di cada studiante.  E materianan ta wordo duna den forma di modulo door di docentenan diploma den e ramonan aki. Pa e motibo aki y door cu EduCampus ta mira educacion y formashon di e ser humano como algo organico, holistico,flexibel y menos mara na un localidad fisico, e scohencia pa haci Cas di Cultura nan cede a cay hopi na agrado di tur dos organisacion.

Cas di Cultura, cu ainda ta den pleno preparacion pa un renovacion grandi, a pensa hopi riba e ampliacion di su funcionnan como centro cultural y plataforma principal di Aruba, centro di educacion cultural y galeria di arte, pa atrae mas publico a base diario. E extra funccion di espacio pa enseñsa, unda lo tin mucha tur mainta den "Cas" ta trece bida y dinamismo y a la bes ta crea un otro tipo di alumno cu semper lo ta na altura di e bida cultural, artistico y social di Aruba. Den e opinion di e dos organisacionnan e "infusion" aki lo crea ciudadanonan bon forma y cu pensamento amplio y habri.

Tanto Cas di Cultura como EduCampus ta motiva y ansioso pa e formula nobo di colaboracion aki resulta den inovacion den educacion na Aruba y pa e ta un stap mas den pone importancia na Arte y Cultura y e industria creativo.