ORANJESTAD (AAN): Dialuna dia 30 di Augustus 2021, Corte Superior lo trata e apelacion di caso IBIS, caminda 6 sospechoso lo mester presenta den Corte di Husticia.
Na Januari 2021 tabatin e caso “regie” y Februari 2021, Hof di Corte Superior lo dicidi riba e peticionnan di abogadonan di Paul Croes. Promer a stipula September 2021 pa tratamento di e caso pero a cambia esaki pa Augustus 2021.
Ta asina cu di e 6 sospechosonan, 3 cu a worde declara liber. Manera ta conoci, Paul Croes a worde condena na 4 aña di prison. Ta asina cu Ministerio Publico a apela e sentencia mientras cu Paul Croes, su señora Melony Croes Paesch y señor Wever a apela e sentencia contra nan.
PETICIONNAN PA INVESTIGACION:
Den e “regie zitting”, e 3 Huesnan di Corte Superior cu ta forma e Hof, a duna oportunidad na e abogadonan di e 6 sospechosonan pa haci peticion pa investigacionnan cu nan ta desea.
E biaha aki Paul Croes ta worde representa pa mr. Sulvaran di Curacao y mr. Illes di Aruba. Di parti di e abogadonan aki a haci un serie di peticionnan por escrito na Hof y Ministerio Publico a haya copia di esakinan pa por reacciona.
Den sala Corte tabata presente abogado mr. Marchena cu a representa señor Di Vecchia, kende a worde declara liber pero Ministerio Publico a apela. Abogado mr. Lejuez a representa e dama Martinus, kende tambe a worde declara liber pero Ministerio Publico a apela. Tambe mr. Lejuez a representa señor Wever, kende a haya un multa y a apela.
Abogado mr. Oomen a representa e dama Nuñuez kende a worde declara liber pero Ministerio Publico a apela e sentencia. Abogado mr. Illes a representa Paul Croes y su señora Melony. Mr. Sulvaran tabata na Curacao.
E dia ey ni Di Vecchia, ni Wever a presenta, pero nan abogado si.
PG A REACCIONA RIBA UN PETICION:
Procurador General (PG) a bisa Hof cu e kier reacciona riba e promer peticion di mr. Sulvaran y mr. Illes pa scucha un trahador na KIA. PG a bisa cu e ta rechaza e peticion aki.
Na opinion di PG, e no ta haya cu tabatin violacion di derechonan di Paul Croes. Segun PG, tabatin limitacionnan pa Paul Croes den KIA pero no ta haya cu a viola reglanan di Derecho Humano.
LO SCUCHA TESTIGONAN DI PAUL CROES:
Ta asina cu Hof na Februari 2021, via video conference, a tuma decision riba e peticionnan di abogadonan mr. Sulvaran y mr. Illes. Hof a dicidi cu ta honra practicamente tur e peticionnan di e abogadonan. A dicidi cu ta bay scucha e director di KIA, director di DIMAS y un trahador di KIA.
Dia 30 di Augustus 2021 lo cuminsa cu tratamento di e caso cu sigur lo bay tuma algun dia. DIARIO lo informa lectornan tur loke ta sosode den sala di Corte di Husticia di Aruba.
