Rapport di CPI di Oficina Central di Estadistica
ORANJESTAD (AAN): Oficina Central di Estadistica (CBS) a emiti nan relato mensual di e calculo di e famoso CPI, esta e Indice di Prijs di Consumo.
E CPI pa luna di Mei 2025 ta 109.57, loke ta representa un caida di 0.3% compara cu e indice di April 2025 (109.93). E cambio di e CPI pa e ultimo diesdos lunanan (Mei 2024 te cu Mei 2025) ta 0.1%, un caida di 2.5 punto di porcentahe (ppt) compara cu e periodo corespondiente di aña pasa (2.6%).
E promedio anual (ultimo 24 luna) di e tasa di inflacion pa e periodonan di Mei 2022 te cu Mei 2023 y Mei 2024 te cu Mei 2025 ta 1.1%, un caida di 0.7 ppt compara cu e 1.8% registra den e periodonan di Mei 2021 te cu Mei 2022 y Mei 2023 te cu Mei 2024.
Durante e luna aki, ocho di e 12 sectornan a registra caida di prijs. E caidanan cu tawata tin e mayor efecto riba e CPI a wordo registra pa e sectornan di “Mobilario” (-2.3%) y “Transporte” (-1.5%), causando un efecto di respectivamente, -0.21 y -0.19 ppt. E caidanan den e sectornan restante a contribui cu un efecto di -0.06 ppt riba e CPI di Mei 2025.
E caidanan aki a wordo contraresta parcialmente door di principalmente un subida den e indice di e sector di “Restaurant y hotel” (1.9%) cu a contribui cu un efecto di 0.10 ppt riba e CPI di Mei 2025. E subidanan den e sectornan restante a contribui cu un efecto di 0.03 ppt riba e CPI di Mei 2025.
E caida den e sector di “Mobilario” a wordo causa principalmente door di un caida di 11.1% den e categoria “Aparato pa uso domestico”, causando un efecto di -0.28 ppt. E caida den e sector di “Transporte” a wordo causa principalmente door di un caida den e categoria “Gasto relaciona cu uso di vehiculo di transporte personal” (-3.6%), causando un efecto di -0.29 ppt. E subida den e sector di “Restaurant y hotel” a wordo causa principalmente door di un subida den e categoria “Servicio di alohamento” (52.4%), causando un efecto di 0.08 ppt.
Canasta di consumo: E asina yama “canasta di consumo” di e CPI ta consisti di 408 bienes y servicionan. Compara cu April 2025, 49.8% di e bienes y servicionan aki a conoce un aumento di prijs causando un efecto di 0.78 ppt, mientras cu 32.8% ta mustra un caida di prijs, cu a contribui cu un efecto di -1.10 ppt y pa e restante 17.4% no tawata tin cambio den prijs. Compara cu April 2025, prijsnan di bienes (-0.7%) a conoce un caida y a causa un efecto di -0.42 ppt, mientras cu prijsnan di serviconan a subi cu 0.2% y a causa un efecto di 0.10 ppt riba e CPI di Mei 2025.
Core inflation: E asina yama CPIC (core inflation) - CPI excluyendo e efecto di energia y cuminda - a registra na Mei 2025 un subida di 2.0%. E indice di energia - cu ta consisti di e productonan: electricidad, awa, gasolin y diesel - a registra un caida di 3.0%. E indice di cuminda a registra un subida di 1.6%.
Bestaansminimum: E asina yama bestaansminimum pa un hogar consistiendo di dos adulto y 2 mucha (edad 0-15 aña) na Mei 2025 ta Afl. 5,510, un caida di Afl. 3 compara cu April 2025 (Afl. 5,513). E bestaansminimum pa un hogar di 1 adulto ta Afl. 2,624, un caida di Afl. 1 compara cu April 2025 (Afl. 2,625).
