Cas di Cultura lo sacudi cu un Obra Teatral di Caliber yama ‘Spirito’ na luna di October

Directora sueco lo ta encarga cu esaki

ORANJESTAD (AAN): Durante luna di October venidero, Aruba lo bay cera conoci cu un obra teatral di caliber halto, cu lo bay keda sigur marca den historia, y cu lo por kizas competi den futuro tambe na festivalnan internacional di teatro.

   Un obra teatral cu decór inigualable riba stage di Cas di Cultura, y lo bay combina cu diferente avance tecnologico tambe pa haci e obra “Spirito” bira esun cu tur hende lo bay papia y memoriza como esun di mas grandi di 2023.

   Durante un conferencia di prensa convoca den sala grandi di Cas di Cultura, e directora Vicky Arens a presenta e obra ‘Spirito’ cu e directora sueco Hilda Hellwig, y tambe parti di e elenco cu lo ta riba escenario cu ta hendenan conoci den mundo di actuacion riba e isla.  Tabata presente Carlos Croes, Faritah Luidens, y Jhon Freddy Montoya.  Demas artistanan cu no tabata presente ta Tuesday Irwin y tambe Dimanche Gonzalez.

   E obra ‘Spirito’ ta basa riba e obra di teatro di novela, skirbi pa e escritor Henrik Ibsen di Noruega na aña 1881.  E lo ta adapta pa decada di 1980 den e “dianan glorioso” di telenovelanan.  Pues e lo ta dramatico, humoristico, picaro, lo tin tension, intrigua, y dirigi pa un directora profesional Hilda Hellwig procedente di Suecia.

   “Spirito” ta wordo presenta door di Cas di Cultura y produci pa Faritah Luidens mes, cu ta priminti di ta un storia di caliber, y lo ta algo cu bon amante di obranan teatral no por perde.

   Obra Spirito lo bay pasa riba Diabierna 20 di October, y Diasabra 21 di October 2023 den Cas di Cultura cuminzando pa 7:30 pm.  E actornan presente cada uno a mustra con orguyoso nan ta di ta formando parti di un show di caliber cu despues di basta tempo porfin Aruba lo por goza di algo asina bek.

   Faritah Luidens a enfatisa cu nan a dedica hopi na decoracion di escenario, y esaki ta algo cu lo bay sorprende publico ora di acudi pa mira Spirito.  Carlos Croes na su turno, a agrega cu riba escenario nan lo bay haci lo ultimo den tecnologia pa por sostene e obra aki cu ta bay no djis fascina publico cu e storia y actuacion, pero tambe e decór den su totalidad.  Nan lo bay cuminza bende carchi di antemano, y mirando e interes cu esaki ta hayando caba, e chens ta grandi cu ‘Spirito’ por yega sold-out rapidamente, pues ta mihor pa busca bo carchi trempan.

   Historia di directora:  Hilda Hellwig ta wordo considera como un gran directora di teatro, opera y film Europeo, y e tin mas cu 80 obra na su nomber. Den zomer el a haci un gran audicion na Shanghai (China), pa cual el a wordo invita pa traha un obra di Ibsen cu top actornan Chines.

   Hellwig a namora di Aruba algun aña atras y ta biba aki part-time pa “de-stress” ora su bida druk di trabao y viahe den ta bira di mas.  Cas di Cultura ta sinti su mes honra pa por conta cu su genio inigualabel na Aruba y e mes ta encanta pa por traha cu Aruba su profesionalnan di teatro den nos lenga materno Papiamento. Como cu teatro ta un manera importante cu ta stimula exprecion, inspira creacion y un manera impactante pa trece topiconan actual riba e mesa di dialogo, e fondonan cultural UNOCA, Fonds Podiumkunsten en Prins Bernhard Cultuurfond Caribisch Gebied a mira e importancia pa apoya un obra pa adulto bek riba escenario di Cas di Cultura.