Quota Club a anuncia nan 'Siman di Concientisacion di Cuido di Oido'

ORANJESTAD (AAN):   Diamars atardi, na edificio di FEPOH, Quota Club International of Aruba tabata tin un conferencia di prensa pa asina anuncia nan proximo actividad.

            Ivy Simon, Presidente di Quota tabata hopi emociona di por anuncia e siman di 'Kibra Silencio' cual awor ta conoce un cambio di nomber.

            El a splica cu e nomber aki ta conoci pa algun aña caba pero a cuminsa sinti e necesidad di e oido. Hopi hende no ta para keto un rato na e importancia di e cuido di oido te ora cu nan perd'e. Pesey e aña aki nan lema ta wordo cambia pa 'Siman di Concientisacion di Cuido pa Oido', cual lo inicia oficialmente dia 18 di September.

            E parti di concientisacion ta hopi importante pasobra hopi hende no sa mes cu nan tabata tin problema cu oido te ora cu nan a perde nan oido, a bisa.

            For di aña 1989, 34 aña pasa, Quota Club a cuminsa cu nan prome testnan di oido. E prome persona cu a haci test di oido tabata Sra. Cherryldine Buckley, a indica.

            No tabata algo facil y durante e añanan por a experencia cu durante carnaval hende no ta worry, ni maske ta parti 'earplugs' pa proteha e oido. Segun e añanan a pasa, Quota Club a bin ta parti 'earplugs' y nan ta contento cu durante e luna di September, ta tuma un siman, pa hunto cu varios instancia realisa e siman pa test oido den forma gratuito.

            E aña aki ta conta cu participacion di FEPOH, SVb San Nicolas, Aruba Hearing Institute y The Specialists. Na e cuater lugar aki, for di awe diaranson por cuminsa haci cita pa un test di oido gratuito. Mester corda cu e cuponan ta limita. Pesey mester yama y haci e cita cu tempo.         E testnan di oido lo wordo haci den e 'Siman di Concientisacion di Cuido di Oido', entrante 18 di September.