Marinus Wegereef, lider di proyecto:
*Un 'cunucu di demencia' tambe ta den nan plan
ORANJESTAD (AAN): Fundacion Alzheimer Aruba a yama un rueda di prensa pa motibo cu luna di September ta e luna di Alzheimer, asina Marinus Wegereef, lider di proyecto di e fundacion a indica.
El a sigui bisa cu cada persona, directa of indirectamente tin di haber cu un familiar of conocir cu e condicion aki.
Wegereef a agrega cu mayoria conoce loke ta e tipo di demencia cu yama Alzheimer, cu casi 70% di e malesanan di demencia ta Alzheimer. For di estadisticanan di Oficina di Estadistica y Censo di 2010, den 2030 lo bay tin tres biaha mas pashent cu e condicion di Alzheimer.
A subraya cu tin hopi trabao pa haci y pesey a pidi pa traha conhuntamente cu Gobierno di Aruba pa wak con ta bin cu un plan grandi. Tin proyectonan hopi grandi y un di nan cu e fundacion ta organisa ta un simposio dia 23 di September proximo.
E fundacion ta bin cu plannan grandi y un di e proyectonan cu nan kier realisa ta un training pa famia riba con pa haci e trabao na cas. Otro proyecto ta e 'Amber Alert' cual ta ora cu un mucha ta perdi, esaki ta un señal pa bay busca.
Relaciona cu esaki lo papia cu gobierno pa bin cu un 'Silver Alert'. Na Merca esaki ta un exito. Ora un persona ta perdi, tur instancia ta getrain pa yuda y haci un buskeda grandi, a bisa.
Finalmente, Marinus Wegereef a indica cu nan deseo tambe ta pa bin cu un 'cunucu di demencia'. Na Hulanda nan ta yam'e 'dementie dorp' pa esnan cu tin e sindroma pa nan haya un bida digno. Esaki ta un di e plannan pa Aruba, a duna di conoce.
