Cas di Cultura cu yen actividad durante nan luna cultural

ORANJESTAD (AAN):   Na Cas di Cultura tabata tin un conferencia di prensa pa asina anuncia e luna cultura di maart cu tres evento cu Cas di Cultura mes a carga e luna aki caminda tabata tin un preparacion hopi intenso.

            Directora di Cas di Cultura, Vicky Arens - Tjon A Tjoe a duna di conoce cu nan ta basta ansioso pa publico pasa wak tur loke tin pa e luna aki di maart.

            E diabierna aki ta inicia cu e 'Aruba Doet Community Concert' cual ta completamente gratis. Lo tin un tremendo banda local pa 6 or di atardi.

            Riba dialuna 13, lo tin 'White Rabbit Red Rabbit' (version hulandes), e di dos edicion. Ana pasa tabata e prome biaha y diamars 14 lo tin e version na Papiamento.

            Riba 15 di Maart lo tin Poeta di Patria organisa pa Departamento di Cultura y ta totalmente gratis. Esaki lo ta 7'or di anochi.

            Riba 18 di Maart lo celebra Dia di Himno y Bandera entre 10 am y 3 pm.

            Arens a sigui bisa cu riba 24 di Maart lo continua cu e musical di Colegio Arubano 'All that glitters is not gold'. Lo sigui cu 'Kids intro to Art riba 25 di Maart y lo finalisa cu 'Feel the Beat NTG & NLG' riba 26 di maart.