ORANJESTAD (AAN): Informacion for di Bonaire ta indica cu siman pasa Diabierna, 3 maart, den e conference room di Delfins Beach Resort,
e ekipo di Gamma IT Solutions a duna un presentacion di Payroll y Human Resources (HR) na diferente compania y organizacion na Bonaire.
Gamma IT Solutions ta conta cu oficina na Aruba y na Curaçao y ta e compania cu a trece Payroll Pro HRM riba mercado.
Payroll Pro HRM ta un programa di payroll y HR cu ta worde uza na Bonaire, Curaçao, Aruba, St. Maarten, Saba, St. Eustatius, Suriname, Jamaica y Guyana. E ta sin duda e programa di payroll y HR mas uza den Caribe.
Durante e presentacion aki e invitadonan a sera conoci cu e programa Payroll Pro HRM y ademas por a disfruta di un dushi coffee break.
Glennd Helena, consultant di Gamma IT Solutions, a trece dilanti informacion tocante e parti di payroll, HR y tambe e mobile app.
Den e presentacion a enfoca riba e eficiencia cu Payroll Pro HRM ta ofrece na su usuarionan. Payroll Pro HRM ta facil pa uza y cu hopi funcionalidad pa yuda e ekipo encarga cu e parti di administracion di salario y HR haci nan trabao di un manera mas eficiente.
Ademas, pa medio di e mobile app empleadonan por download nan payslip of loonbelastingkaart, pidi vakantie, meld ziek, tuma contact cu e departamento di HR, pidi timeback of agrega overtime y wak informacion personal entre otro.
Teiry Croes di Gamma IT Solutions, ta comenta “Nos ta gusta haci e eventonan aki pa nos por interactua cu diferente persona y unda nos ta haya e oportunidad pa por presenta nos software.”
Gamma IT Solutions ta gradici Isabel Winters, Event Manager di Delfins Beach Resort, y full su ekipo pa e tremendo servicio cu nan a duna y pa asisti durante e evento aki.
