Ploegnan cu mester mantene Colony limpi pa hopi tempo no a drenta San Nicolas

Presidente di San Nicolas Business Association:

 *Mester manda ploegnan, pero tambe controla e ploegnan 

ORANJESTAD (AAN):   Presidente di San Nicolas Business Association (SNBA), Errol de Freitas, a duna di conoce cu na Aruba tin varios 'linear park'. E areanan popular pa hende cana mainta tempran ta den Colony. For di 5'or mes ta wak hendenan ta cana den Colony. Pero den Colony, no tin niun luz. E hubadanan ta creciendo riba caminda. No tin niun drempel, a remarca.

            Segun De Freitas, SNBA a trece esaki dilanti durante e ultimo dos añanan, na e departamento con  concerni y tambe a mencion'e den e ultimo Conseho di Minister cu tin entrevistanan di hendenan cu ta usuarionan di esaki, cu ta papiando di e situacion aki.

            A agrega cu nan no ta pidiendo klinkers ya cu por a haci'e cu asfalt pa traha e drempelnan necesario eynan. A bisa cu e ploegnan cu tin cu mantene esaki limpi, pa hopi tempo no a drenta San Nicolas y ora nan drenta mes nan ta tuma tempo pa haci 10 meter y ta tarda un siman pa haci 10 meter.

            E presidente di SNBA a remarca cu mester trece e cambio necesario pa e pueblo di San Nicolas pa e por conta como parti di e comunidad di Aruba.

            "Cu hopi respet y humildemente mi ta pidi na e departamentonan concerni pa  no solamente tuma rienda di esaki y manda ploeg, pero manda controla e ploegnan tambe pa nan haci e trabao aki manera mester ta", a expresa.

            Hotelnan ta bay habri pariba di brug y e bista ta nada pa ricibi e hotelnan aki. Laga no warda prome cu esaki tin cu sosode. Laga haci'e y envolvi tur hende y asina ta 'build up' e comunidad, De Freitas a declara.