Cas di Cultura a luci cu colorido y expresion artistico durante e “Prome Encuentro Multicultural 2021”

ORANJESTAD (AAN) – Diabierna 21 di Mei aki, Cas di Cultura, como anfitrion, a luci cu hopi colorido y expresionnan artistico, di e diferente nacionalidadnan representa na Aruba,

durante e “Prome Encuentro Multicultural 2021” relaciona cu e “Dia Mundial di Diversidad Cultural pa Dialogo y Desaroyo”.

Prome cu e presentacionnan riba stage tabata tin un hopi bunita desfile y presentacion pafo, di e gruponan cu a participa.

E Lema di e encuentro cultural aki tabata: “Pone e Arubiano na haltura di su cultura y siñ’e conoce di otro”.

E evento aki a wordo organiza pa Ministerio di Cultura Aruba, conhuntamente cu Departamento di Cultura Aruba.

Paisnan cu a participa cu nan tremendo presentacion tabata: Aruba, Argentina, Bonaire, Brasil, Colombia, Cuba, Curacao, Republica Dominicana, Spaña, Haiti, India, Mexico, Portugal, Peru, Filipinas, Suriname, Venezuela.

Pa inicia e evento, Minister di Finanzas, Economia y Cultura a hiba palabranan di bon bini na tur presente, entre otro Cuerpo Consular y tur grupo participante, y seguidamente a duna su discurso, cu por lesa den otro articulo.