ORANJESTAD (AAN) – Den su discurso di apertura na e “Encuentro Multicultural 2021”, cu a tuma lugar Diabierna ultimo, den Cas di Cultura,
Minister Xiomara Maduro como titular di Cultura, a expresa cu ta un honor y placer pa e ta presente eynan, den e calor di cada pais representa den e evento aki.
Esaki, e mandatario a bisa, ta un anochi pa celebra hunto y festeha e rikeza multicultural cu tin den nos pais.
Minister Maduro a indica cu e celebracion aki ta duna oportunidad pa ser conoci cu otro, maske sea un tiki mas, pa medio di musica, baile, folklore, cuminda, idioma, expresion artistico, y a acentua cu ta un privilegio p’e di ta presente den e Prome Encuentro Multicultural na Aruba, relaciona cu e celebracion di “Dia di Diversidad Cultural pa Dialogo y Desaroyo”.
\UNESCO a proclama dia 21 di Mei di cada aña como e Dia Mundial di Diversidad Cultural, pa Dialogo y Desaroyo” miho conoci como e Dia di Diversidad Cultural.
“UNESCO ta pidi henter mundo y tur hende pa duna di nan parti pa asina por cera e distancia, e asina yama ‘gap’ entre e culturanan.
Segun Nacionnan Uni, si den cada pais nos trece diferente cultura na mundo, nos por contribui na paz, na desaroyo positivo y stabilidad social di nos comunidad”, Minister Xiomara Maduro a indica.
El a agrega cu e forma pa logra biba den armonia y respet pa otro, ta pa medio di dialogo; esta, comunica cu otro, di un of otro forma, pa medio di un intercambio cultural, manera e encuentro multicultural cu a tuma lugar Diabierna anochi.
“Asina ta crea un plataforma na unda tur colonia di tur nacionalidad estableci na Aruba, por bin hunto y comparti nan amor patriotico cu otro. Y mas bunita, cu nos propio Cas di Cultura ta brinda nos espacio y tarima, pa por expresa sin limite, nos herencia cultural y nos talentonan artistico”, Minister Xiomara Maduro a expresa.
El a agrega cu un dia asina ta engrandece nos pueblo su conocemento y ta duna nos e sentimento di paz, union, amor, solidaridad, respet y tolerancia.
“Pa medio di esaki, nos ta siña sostene y valora nos diversidad cultural, cu na mes momento ta haci nos asina unico y special”, e dignatario a señala.
E Minister a splica cu e encuentro multicultural a cuminza na Aruba na aña 2006, bao di nomber “Feria Multicultural”, e tempo ey riba Dia di La Raza cu no ta un dia mundial y tampoco un dia pa celebra multiculturalidad.
“Cu transcurso di tempo a dicidi pa celebra encuentronan multicultural aki, riba diferente fecha. Y e aña aki a dicidi pa cambia e fecha pa un dia specifico, esta 21 di Mei riba Dia Mundial di Diversidad Cultural. Pa coincidencia, 21 di Mei ta e fecha cu Aruba a oficializa nos Idioma Materno, Papiamento, na aña 2003. Nos Idioma Papiamento ta loke ta cera e gap entre tur e nacionnan cu ta biba riba e pida baranca aki” e dignatario a expresa.
Diabierna anochi, e mandatario a declara e fecha 21 di Mei como esun cu den futuro Departamento di Cultura di Aruba lo sigui organiza e celebracion multicultural aki, hunto cu tur e colonianan cu ta residencia na Aruba.
