Cantante Rudy Marquez a fayece cu 81 aña di edad

ORANJESTAD (AAN): E cantante venezolano Rudy Márquez a fayece Diaranson mainta na e ciudad di Medellin na Colombia, segun su famianan a confirma.

   E artista a muri cu 81 aña di edad na Clinica Las Americas, despues di a enfrenta un bataya duro contra cancer di pancreas.

   Durante su ultimo dianan na Colombia, Rudy tabata acompaña cada rato cu su famianan mas cercano.  Un relato oficial di e famia riba social media a haci e anuncio: “Cu profundo tristeza nos ta anuncia cu nos querido Rudy Márquez a fayece na ciudad di Medellin, Colombia, despues di a hiba un bataya duro contra cancer”.

   Rudolfo Márquez van Stenis a nace na Caracas dia 7 December 1942, y tabata un compositor, cantante, productor musical, locutor, y animador di TV tambe.  E tabata conoci pa e novela “Ana Maria” (1978), tambe “Una Muchaha llamada Milagros” (1973), y “La mujer prohibida” (1972).  Despues el a nacionaliza como Colombiano.

   Desde decada di 1960 el a participa den varios grupo musical, di cual por menciona ‘Los Demonios del Rock’ (1961), ‘Rudy y Los Twist Cats’ (1962), ‘Los Dangers’ (1963-1965), ‘Los Impala’ (1965-1969), y ‘Los 007’ (1970).

   Ora e tabata den banda Los Impala, el a cuminza amplia su carera inetrnacionalmente, y el a sigui esey ora cu el a bira solista na 1971.  Na 1972 a sali e album ‘Hablame Suavemente’ cu tabata contene varios cancion cu a bira hit na Aruba tambe, e.o. ‘Quiero ser yo”, “El futuro vendrá”, “Se que algo vendrá”, y “Hablame suavemente”.  E ultimo cancion aki ta un version na spaño di “Speak Softly Love”, cu ta tema musical di The Godfather.  Rudy tabata wordo considera como e cantante eterno romantico.

   Ademas di esey, e tabata producer pa Mirla Castellanos, Nancy Ramos, Pecos Kanvas, Los Tres Tristes Tigres, Tony Racal, Los Cazadores, Los Hornets, Lara Lee, Los Tsee-Mud, Victor Gámez, Arelys, y Los 007.