ORANJESTAD (AAN): Manera cu DIARIO a trece dilanti caba, 14 docente di St. Paulus School na San Nicolas
ta pasando nan vakantie di October na e pais Estonia cu asistencia di Erasmus+ y SKOA pa asina experiencia di cerca uso di tecnologia den scol y avancenan tecnologico den e pais.
E docentenan lo bay hasta haci ‘job shadowing’ na Kohtla-Järve Slavic Primary School y lo sigui charlanan di sosten na E-Estonia Briefing Center, E-Governance Academy y un workshop na Tallinn University. Ademas nan lo haci bishita na diferente museo y lo tin intercambio cultural na 2 diferente ocacion. Nan a yega bon na e capital Tallinn na Estonia.
Riba Diaranson nan a presencia un sesion informativo na e e-Governance Academy (eGA) durante nan bishita na Estonia. Mirando nan mision, e expertonan na eGA desde aña 2002 a conecta cu mas di 290 organizacion na 143 pais pa construi sociedadnan digital exitoso pa mehora bida di ciudadanonan, reforza nan economianan, y bin cu forma mas transparente, democratico, y efectivo di gobernacion.
E ta algo cu sigur Aruba tambe tin di tuma bon ehemplo di nan. E docentenan di Aruba a haya chens di duna presentacion di nan scol y tambe di e cultura di e isla, y nan a keda satisfecho cu e exitoso presentacion.
