Crisis Team --- ORANJESTAD (AAN): Mas ciudadano vacuna, mas lihe nos lo sali di e pandemia.
Segun Crisis Team, diaranzon un grupo grandi di ciudadano a bay tuma nan booster shot di e vacuna na Centro Libertador Betico Croes. Un total di 959 persona cu a acudi.
Awor ta na turno tur esnan 40 plus pa bin ricibi nan vacuna sin haci un cita, pues cana kibra. Tambe ta importante pa remarca cu e organisacion di specialistanan di Aruba (OMT) a distancia nan mes di declaracionnan di publicacion cu a sali di e director di Hospital haci na algun media. Nan a recomenda un y tur pa bay tuma e vacuna of Booster Shot ya cu ta comproba cu e ta brinda bon proteccion contra e efectonan mas severo di e virus y tambe Hospitalisacion.
E orario cu por acudi na C.L.B. ta 8'or di mainta pa 3'or di atardi nonstop. Entrante otro siman diamars 11 di januari Crisis Team lo staciona e Operation Mobile Unit di BRA na IMSAN pa brinda mas oportunidad pa vacuna y tuma e booster shot na e parti di poblacion pariba di brug y San Nicolas. Lo tin Doctor presente pa asisti si tin cualkier reaccion alergico. E orarion na Imsan tambe ta di 8'or di mainta pa 3'or di atardi nonstop. Crisis Team y DVG ta urgi comunidad pa busca e Booster Shot si bo tin mas di 3 luna cu bo a ricibi bo di dos vacuna y tur esnan 12 aña pariba cu falta pa tuma e promer of di dos vacuna tambe por acudi.
