Camila Avella a bira Miss Universe Colombia 2023

E ta casa y tin un yiu muher

BARRANQUILLA: Diasabra anochi a escoge e muher di Colombia cu lo representa e pais na e certamen di Miss Universe.  E biaha aki Camila Avella, representando departamento di Casanare, a bira e Miss Universe Colombia nobo.

   For di comienzo caba, su participacion a bira un acontecimento historico, cu a bira posible debi cu na 2022 e organizadornan mundial a elimina e reglanan cu tabata prohibi antes pa muhernan casa y cu yiu no tabata mag di participa na Miss Universe.

   E dama di 28 aña di edad, ademas di ta casa y tin un yiu muher di 2 aña, ta un comunicador social y periodista, y tabata presentadora di e reality show ‘El Desafio 2018’ (un show similar cu ‘Survivor’ di CBS-TV di Merca), y e dama ta conta cu un trayectoria grandi tambe den modelahe.

   E dama Camila Avella ta procedente di pueblo di Yopal (na departamento di Casanare), y el a bin sali como e favorito dilanti e cuerpo di hurado.  Den hurado tabatin Aysjel Antonia Bernadette, kende ta coordinadora di evento pa Gobierno di Curaçao.  Tambe a mira Tatyana Orozco como hurado.  E ta defensora di igualdad di genero.  Tambe a mira como hurado, Andrea Meza kende ta modelo y ex-Miss Universe 2020.