Cambio climatico ta un riesgo economico y financiero inmediato pa Aruba

Minister Geoffrey Wever

ORANJESTAD (AAN): Gobierno di Aruba, por medio di Minister di Finansa, Asunto Economico y Sector Primario, mr. Geoffrey Wever, a habri oficialmente e presentacion di e CORVI Report (Climate and Ocean Risk Vulnerability Initiative), un estudio profundo cu ta analisa e riesgo climatico y marino di Aruba y su impacto riba nos economia, infrastructura y medio ambiente. 

E evento, cu a tuma lugar diamars 4 di november 2025, a reuni representante di gobierno, sector priva, NGO y academia, pa discuti e resultadonan y recomendacionnan di e estudio, cu a ser realisa den colaboracion cu e Stimson Center y varios partnernan strategico internacional. 

Un base cientifico pa desaroyo economico sostenibel

Den su discurso, Minister Wever a enfatisa cu e CORVI Report ta representa un documento di gran importancia strategico pa Aruba, e ta duna un bista claro riba nos vulnerabilidad climatico y e cluster principal di riesgo cu nos isla ta enfrenta:

Deterioro di estado di e ecosistema marino y di costa,

Cambio demografico y presion riba infrastructura, y

Fragilidad di un economia cu ta depende fuerte riba turismo di costa. 

Minister Wever a enfatisa cu cambio climatico “no ta un menasa den futuro, sino un riesgo economico y financiero inmediato” pa Aruba. Subida di nivel di lama, erosion di costa y calor extremo ta pone presion directo riba nos infrastructura, estabilidat financiero y bienestar di nos comunidad. 

Segun Minister Wever, “fortalece nos resiliencia climatico ta un imperativo economico.” Pa logra esaki, Aruba mester atrae y mobilisa inversionnan climatico sostenibel, lo cual ta depende di un ambiente di inversion transparente y stabiel. 

E Minister a splica cu sin un ecosistema financiero solido, no por tin inversion climatico sostenibel. Gobierno tin e tarea pa crea e condicion necesario pa estimula colaboracion publico–priva y pa de-risk inversionnan berde. 

Aruba ta sigui e Principionan di Helsinki

Durante su discurso, Minister Wever a referi na e Coalition of Finance Ministers for Climate Action, un red global di Minister di Finansa, cu Aruba a uni recientemente. E Coalicion ta guia pa e Principionan di Helsinki, un cuadro global pa integra accion climatico den politicanan fiscal y economico.

Minister Wever a resalta dos principio principal: 

Principio 4: Integra cambio climatico den politica macroeconomico, planificacion fiscal, presupuestonan y maneho di inversion publico. 

Principio 5: Mobilisa fondonan priva pa financia mitigacion y adaptacion climatico. 

“Resiliencia no por ta solamente un regel den un presupuesto. E mester ta parti integral di cada desaroyo nacional,” Minister Wever a bisa. “Nos lo crea un ambiente cu ta demostra cu Aruba ta un pais stabiel, proactivo y cla pa atrae inversion pa sostene su futuro.” 

Cooperacion internacional pa fortalece capacidad local

Minister Wever a anuncia cu, den colaboracion cu e International Monetary Fund (IMF) y e Caribbean Regional Technical Assistance Centre (CARTAC), Aruba lo ricibi asistencia tecnico dedica durante 2026. E misionnan lo tin como meta fortalece e capacidad nacional pa integra consideracion climatico den e sistema di maneho financiero publico y pa desaroya politicanan cu mobilisa fondonan priva pa resiliencia climatico. 

Un paso firme pa un Aruba resiliente

E CORVI Report ta sirbi como un base di evidencia, mientras cu e Principionan di Helsinki ta guia e direccion pa un futuro sostenibel. 

“E caminda pa resiliencia ta basa riba colaboracion, innovacion y boluntad politico. Aruba tin e oportunidad pa bira un lider regional den gobernacion climatico-inteligente,” Minister Wever a conclui.