Aruba ta yuda Jamaica despues di horcan desvastador

Yudansa cu Jamaica segun un MoU

• Comunidad ta ser encurasha pa haci donacion
• Por haci donacion di articulo di prome necesidad 

ORANJESTAD (AAN): Despues cu horcan catastrofico di Categoria 5, Melissa a  pasa riba Jamaica diahuebs 28 di october, esaki a causa un gran desvastacion den e parti oost di e isla. E comunidad di Aruba ta uni den esfuerso di ayudo y sosten pa nos isla ruman di Jamaica.

   Gobierno di Aruba hunto cu Consul Honorario di Jamaica na Aruba ta coordinando activamente e ayudo y sosten bao di un (MoU) pa facilita un reaccion humanitario conhunto. Diabierna y dialuna ultimo tabatin diferente reunion na Bestuurskantoor pa coordina esfueroso di yudanza.

   Donacion: Cruz Cora Aruba a mobilisa pa asisti den e esfuerdo di ayudo. E canalnan pa donacion ta stableci pa sigura cu e ayuda por yega na Jamaica lihe y eficazmente.

   Lo tin punto di donacion di Cruz Cora na varios lugarnan designa rond di e isla pa colecta contribucion pa Jamaica.

E donadornan tambe por contribui via e *Red Cross Aruba–Jamaica Relief Fund*.  Esaki ta na banco: Aruba Bank, cu nomber di cuenta: Donate to Red Cross Aruba Jamaica Relief Fund. E number di cuenta: 0384010990.

   Articulo cu ta acepta y necesario ta inclui articulo di cuminda di primera necesidad, producto fresco (si ta sigur y apropia), articulo di higiene pa hende muhe y baby, botter di awa.

   E Consul di Jamaica na Aruba ta den contacto cu YMCA Aruba pa explora e posibilidad di usa nan facilidadnan como lugar oficial pa entrega donacion, pa haci e distribucion mas facil y minimisa problema di transporte.

   Reunion cu comunidad: Un reunion pa e comunidad di Jamaica biba na Aruba lo tuma lugar e Diahuebs aki na Kulture Cafe San Nicolas pa 7:00 anochi.

   Durante e reunion aki lo ta duna informacion tocante e proceso di donacion, lugar pa entrega y e coordinacion cu e representantenan di Jamaica y autoridad local. Gobierno di Aruba a compronde for di e pueblo di Jamaica y su comunidad na Aruba cu nan ta expresa gran aprecio pa tur contribucion material, comestibel of financiero; pa sostene e esfuerso di ayudo y recuperacion di  Jamaica.