ORANJESTAD (AAN): Amika Every, Casey Provance y Denah Beke ta cla pa representa Aruba den e Sudamericano di Gimnasia Artistica.
Despues di dos luna di training intensivo na Bogota, Colombia e trio di gimnastanan aki a indica cu nan ta cla pa subi riba podio y representa Aruba cu orguyo den e Campeonato Sudamericano di Gimnasia Artistica
Bao di e guia y liderazgo di Coach Jimmy Palma na Aruba y Andres llanos na Colombia, e atletanan a pasa un periodo di preparacion riguroso cu hopi dedicacion, disciplina y pasion pa e deporte. Durante e entrenamiento na Bogota nan a tene sesion di entrenamiento intensivo, a traha riba tecnica, forsa y rutina di presentacion pa yega na nivel mas halto di competencia.
Coach Palma a expresa su satisfaccion cu e progreso y e compromiso di su atletanan: “E muchanan a traha duro, a duna tur loke nan tin, nan ta un berdadero ehempel di determinacion y amor pa gimnasia.”
E participacion den e Sudamericano ta un paso importante pa gimnasia Arubano, demostrando cu trabao, consistente y apoyo continuo, e isla por sigui crea talentonan cu por briya na nivel internacional.
Federacion gymnastico Arubano ta desea e atletanan y Coach Jimmy Palma hopi exito den e proximo reto y ta sigur cu nan lo representa Aruba cu orguyo y pasion.
