Calor extremo y extenso: Un normal nobo pa Aruba?

ORANJESTAD (AAN):  Aruba ta sinti mas y mas e efectonan di cambio di clima. Ademas di aumento di secura y

awasero intenso den ultimo 50 aña, Aruba tambe a experiencia un aumento di temperatura y calor. Especialmente den ultimo decadanan, desde añanan 1990 por observa un subida accelera di temperatura.

Aunke hopi hende lo bisa cu na Aruba semper ta haci calor den e temporadanan aki, y cu ta algo ‘natural’, estudionan ta mustra cu ademas di subida den temperatura averahe, Aruba ta experienciando calor mas extremo y extenso. E calor extremo ta causa door di factornan climatico manera temperatura, humedad, biento. Pero tambe tin factornan infrastructural y medio ambiental, manera por ehempel uzo di cement y asfalt, ademas di rosamento y deforestacion. Esakinan ta haci cu e experiencia y stress di calor ta aumenta. E cambio y combinacion di e factornan aki den ultimo decadanan ta haci cu nos ta sinti mas calor.

Conseho Nacional di Resiliencia Climatico (NCRC) di Aruba ta continua cu esfuersonan pa identifica y atende cu e impactonan di cambio di clima, especialmente calor na Aruba. Riba nivel nacional, diferente instancia y instituto ya caba a identifica calor extremo como un di e riesgonan existente mas grandi pa Aruba. E impacto di calor extremo y extenso no ta solamente climatico, pero aun mas, pa nos calidad di bida, incluyendo salud, trabow, productividad, educacion, deporte, suministro di coriente, costo di bida, perdida di biodiversidad y naturalesa.

Si tene cuenta cu e cantidad di hende cu ta labora pafor – den por ehempel turismo, construccion, transporte, agricultura – y observa e desaroyo di envehesimento, ademas di calidad di salud di nos comunidad, e panorama di impacto di calor ta bira ainda mas importante. En corto, impacto di calor ta afecta diferente area cu na su turno tambe ta rekeri adaptacion integral y strategico den diferente sector.

Pa yuda tur hende compronde y prepara mihor pa e riesgonan aki, recientemente a lansa e “Climate Impact Atlas” di Aruba. E web portal nobo aki di clima ta duna informacion riba con calor ta afecta Aruba y kiko por haci pa combati y adapta na calor extremo y extenso. A base di e evaluacion di e riesgonan y e impacto climatico, e concentracion di NCRC ta riba e miho manera di forma responsabel y sostenibel pa Aruba prepara pa y adapta na diferent efecto di cambio climatico. Esaki ta pasonan vital den desaroyo di un strategia di resiliencia climatico nacional pa Aruba. Pa mas informacion tocante NCRC por bishita https://ncrc-aruba.org/cia.