Magaly Brito, Secretario General di SEPPA:
ORANJESTAD (AAN)—E Secretario General di Sindicato di Empleadonan Publico y Priva SEPPA, señora Magaly Brito, den entrevista cu Matutino DIARIO a señala cu e werksternan cu ta haci limpieza pa scolnan, ainda ta den e lucha pa nan derechonan.
Brito a duna di conoce cu el a papia cu e minister encarga tocante esaki, y ultimamente tabatin diferente caso den Corte contra SKOA, cual e trahadornan a gana tambe, y mas reciente un cu SEPPA a gana, pero tabata tin un parti cu cual nan no a keda completamente satisfecho, y a bay apelacion.
“Y tin otro gruponan aworaki cu tambe a bolbe inicia un caso contra SKOA, pa falta di ehecucion of restart cu nan derechonan. Pero hunto cu esaki, mi tin cu menciona cu na Juni ultimo tabata tin e resultado di e caso cu SKOA a lanta den LAR, contra gobierno, cual resultado tabata interesante pasobra a mustra cu e manera con e minister te tempo ey, a atende cu SKOA no tabata esun di mas miho of drechi. Door di core kita e placa di subsidio, mas bien ta sumanan grandi cu por afecta e funcionamento di SKOA y e bienestar di otronan, manera e werksternan loke a sosode tambe, aworaki den e sentencia por mira cu Huez a bisa cu e mester a hacie di un manera mas duidelijk, y e ta pidi tambe y e ta pidi gobierno tambe, pa yega na un acuerdo mas adecua, con si por devolve e placa sin cu mester afecta SKOA y tur otronan envolvi den esaki”, Magaly Brito a splica.
Brito a sigui bisa cu den e caso di e werksternan, specificamente, SEPPA a pidi e minister pa yega na un solucion rapido. “Minister tin tres luna pa contesta Huez kico ta su posicion den tur e situacion cu SKOA, y wak con nos ta pusha tambe na un manera husto pa termina cu e diferente casonan cu tin na porta, pasobra na final ta lastima bo trahadornan. SKOA ta keda wordo mira como un mal dunador di trabao, pasobra e no por cumpli”, Magaly Brito a señala, agregando cu SKOA no por cumpli pasobra gobierno na un manera abrupto, a kita gran parti di e placa di subsidio.
El a agrega cu apesar cu na 2022 gobierno a pone un suma extra disponible pa e fundacion, tur esaki no ta suficiente.
