Diadomingo awor Buque Gloria di Colombia lo ta na Aruba

Publico por bay bishit’e

• Mara den Waf for di Diadomingo te Diaranson 

ORANJESTAD (AAN) E Consul General di Colombia na Aruba, señor Gustavo Serrano Amaya, a convoca un conferencia di prensa relaciona cu e bishita di e Buque ABC-Gloria, insignia di e Armada Nacional di Colombia, cu ta rumbo pa Aruba.

   Consul Serrano Amaya a anuncia cu e Diadomingo awor, esta 3 di Augustus, e Buque Gloria lo ta yegando na Waf di Aruba.

   “El a recori tur lama y a bishita e diferente puertonan na henter mundo, hibando e cultura y presencia di Colombia, acercando e pais na su compatriotanan y na e personanan di diferente nacionalidad,” ta loke Consul a indica.

   Diadomingo awo e Buke lo ta yegando Aruba pa 8’or di mainta, na Waf, y durante su dianan di estadia na Aruba, cu ta di Diadomingo 3 te Diaranzon 6 di Augustus, lo tin diferente actividad paden di e Buque, cu ta inclui tayer di trabao y charlanan.

   Diadomingo 3, pa 8’or di mainta tin un Acto Protocolar, den cual lo ta presente Gobernador di Aruba, Alfonso Boekhoudt; Prome Minister señor Mike Eman, algun minister, Parlamentarionan y e Cuerpo Consular di Aruba, entre otro personalidadnan, y logicamente miembronan di prensa ta invita tur e bishitantenan aki.

   “Igualmente, lo ta presidiendo e acto protocolar, nos Embahador di Reino Hulandes, doctora Carolina Olarte Bacares, ken lo yegando Aruba Diasabra awo”, Consul Serrano Amaya, a duna di conoce.

   E diplomatico, seguidamente, a extende un invitacion na henter pueblo di Aruba y tur compatriota Colombiano, residente pa nan acerca e dia di e Acto protocolar. Lo permiti e ingreso na e waf pa e publico for di 10’or di mainta.

   “Mi kier gradici e autoridadnan di e Puerto di Aruba, APA y señor Figaroa y su ekipo, pa tur su acompañamento y e facilidadnan cu a duna nos, pa e buke por ta aki na Aruba”, Consul Gustavo Serrano Amaya, a expresa.

   Lo permiti e bishita di e publico na e Buque e dianan Diadomingo, Dialuna y Diaranzon na su ora di salida, cu ta merdia. E ingreso ta liber y tur cu kier bishit’e por haci esaki, cu ta un bon oportunidad pa conoce tur skina di e Buque, diferente salon, y di conoce e historia maritimo y cultural di Colombia.