Calco Africano venenoso a yega na costa di Venezuela

ORANJESTAD (AAN): Siman a habri cu un advertencia serio cu a wordo manda pa poblacion di estado Falcon na Venezuela, cu ta situa net pazuid di Aruba.

   Gobierno di estado Falcon a manda e advertenica, pasobra nan a bin detecta presencia di e Calco Gigante Africano (‘Achatina Fulica’) na parokia Guzman Guillermo di municipio Miranda.  Esaki ta keda pabao di ciudad di Coro.

   E calco aki ta venenoso pa salud ambiental y pa un ser humano, ya cu e tin mas di 10 malesa cune.  Awor Gobierno regional a start un campaña di informacion, pa asina educa pueblo di e especie invasor aki, y evita cu nan lo sigui plama rapidamente.

   Autoridadnan ta pidi pueblo di estado Falcon pa keda cu calma, pero tin di keda vigila e infestacion cu a wordo detecta y trata di eradica e reproduccion di e especie toxico aki.

   Nan ta pidi esnan cu mira e calco aki, pa no mishi cune mes.  Su baba mes ta contene hopi parasito y bacteria di riesgo pa salud humano, animal, y pa matanan.  Djis bo no por mishi cune.