ORANJESTAD (AAN): E blackout di Diasabra tabata algo inaceptable, pa cual Prome Minister Evelyn Wever-Croes a yama un reunion urgente
conhuntamente cu Minister encarga cu Energia Glenbert Croes, WEB Aruba NV, NV Elmar y Utilities Aruba NV y nan presidentenan. Durante e reunion cada compania a duna splicacion di e incidentenan y a haci palabracion pa percura cu comunidad ta ricibi e servicio debido.
Berdad WEB actualmente ta pasando den un periodo di transicion. Den cuadro di esaki ta cambiando di ekipo bieu pa ekipo nobo cual ta encera un di e proyectonan mas grandi cu WEB a yega di atende cu ne. Di parti di Gobierno ta compronde cu esaki ta bin cu algun riesgo, sinembargo cinco black out den cinco luna di tempo ta algo cu tin cu atende cu ne. Durante di e reunion a trata ki plan tin na luga pa evita cu durante resto di e periodo di transicion lo sigui tin eventualidadnan y black out. Mester percura pa e black out nan aki no tuma luga mas, pasobra e ta afecta comercio, turismo y ciudadanonan.
Director di Utilities Aruba Anthony Rojer a splica cu e reunion tabata uno serio den cual a delibera e ultimo incidentenan y explora solucionnan pa evita cu tin ripitacion. Director di WEB Alfredo Koolman a duna splicacion kico lo haci pa evita otro blackout. Director di Elmar, Anthony Irausquin a elabora riba e diferente incidentenan cu tabatin despues di e black out, cu Elmar a atende cu ne, a trata plannan pa den futuro y kico lo bay haci proximamente pa loke ta trata e maneho di energia sostenibel di Gobierno. Minister Glenbert Croes a bisa cu a haci peticion pa un investigacion independiente tuma lugar den nomber di Gobierno di Aruba, pa verifica kico a pasa.
