Caiman haya na Corsow a huy for di un granha varios dia pasa

ORANJESTAD (AAN):   Informacion cu a yega for di Corsow ta indica cu e caiman cu a wordo haya diaranson na Dam Pretu ta pertenece na e granha di avestruz cu ta keda den becindario.

E bestia (di mas cu 3 meter largo) tabata desapareci ya caba pa algun dia. E caiman lo a huy algun dia pasa door di lastra su mes bao di un heki skerpi. Esaki a wordo constata door di a mira algun herida na su cuero.

Un bes cu e caiman a logra su meta di bay pafo di e granha, el a logra come tres cacho.

E granha di avestruz a tuma medidanan pa evita otro intento di huida. Parce cu e compania tin permiso pa retene e tipo di bestianan aki. Locual si ta straño ta cu si e caiman a disparce varios dia pasa, dicon no a bati alarma na autoridad riba e peliger den e area.

E biaha aki ta tres pober cacho a muri den boca di e caiman, pero otro biaha esaki por ta fatal pa un persona.

DIARIO no tin informacion si e caso a wordo poni den man di autoridad ora cu e bestia a somenta. Pero ban spera cu esey ta e caso.

Imagen capta for di video di Extra Curacao