Tabata un diaranson mainta 13 di Maart 1996 pa 7 or di mainta un Cessna C-402B matricula P4 AVB pilotea pa Sigfried Eduardo Stede ta take off for di pista di Aeropuerto Internacional Reina Beatrix
cu direccion aeropuerto Josefa Camejo na Las Piedras Punto Fijo Venezuela. Normalmente un vuelo cortico. Hunto cu e piloot Sigfried Stede a biaha tambe Heinrich Roger Leito su casa Sebastiana Geerman -Leito, Orlando Ortega ( di Colombiano) Jason Rowald Segal ( un studiante Americano di 24 aña), Hubert Leonor Thiel su casa Lourdes Bernadeta Thiel-Kelly y nan yiu chikito Leonardo Arsenio Thiel.
E vuelo nunca a yega su destino. Na caminda fayo mecanico di e avion, cu a coi candela na e parti di su hala, ta haci cu e avion ta cai den mondinan noord di aeropuerto di Punto Fijo Josefa Camejo. No tabatin sobreviviente.
Esaki tabata e peor accidente di trafico aereo den historia di Aruba.
Un tristesa tabata reina na Aruba unda cu gobierno a declara luto nacional, entiero di e Arubianonan a tuma lugar ariba diabierna 15 di maart 1996.
Na 1997 a pone un plakaat conmemorativo na unda e avion a cai.
E escritora Arubiano Yolanda Croes a skirbi un buki ariba e accidente tragico aki.
Compila pa Roberto Croes
Nos Historia Nos Herencia
