Arubahuis a yama ayo na coordinador di enseñansa James van der Linde

ORANJESTAD (AAN): Informacion for di Den Haag ta indica cu na Arubahuis a tuma lugar un recepcion ameno

pa e coordinador di Departamento di Enseñansa di Arubahuis James van der Linde cu a dicidi pa sigui su carera profesional na Erasmus Medisch Centrum na Rotterdam. Banda di personal di Arubahuis, tambe tabata presente algun mentornan.

   Na e ocacion aki Minister Plenipotenciario Guillfred Besaril a tene un discurso den cual el a elabora riba su experencia cu James na cabes di Enseñansa na Arubahuis. Segun e mandatario e departamento di enseñansa ta forma e “core business” di Arubahuis pa motibo cu ta trata di cuido y guia di yiu di hende, unda e meta ta pa nan bay bon den nan studio, cu nan mes y cu nan por regresa bon nan pais.

   ‘Esey ta loke ami y James a comparti desde e prome momento unda nos ta bay encontra na Arubahuis un dimension nobo cu por hiba nos den e proximo añanan y tambe hiba e departamento di enseñansa den un otro direccion. Ora mi a cuminsa como minister mi a encontra cu Arubahuis tin apenas cuater mentor. Nos a logra yega na ocho mentor, cu e intencion pa yega na diez mentor.’

   E mandatario a sigui bisa cu e topico aki a keda papia cu e minister di Enseñansa Endy Croes durante di su bishita recientemente na Hulanda. Mescos ta e punto cu si mester amplia e guia di unicamente e prome aña pa tambe e di dos aña di estudio. Minister Besaril: ‘Pasobra nos tin cifranan, danki na e network di James cu casi 70 porciento di studiantenan ta cambia di estudio den nan prome aña.

   Esaki tin consequencia pa nan fianza di estudio y impacto den nan rapides di estudio. Tambe mester analisa e motibo tras di porcentahe grandi di studiante cu ta cambia di estudio. Nos a bin ta nota cu e informacion riba escogemento di estudio na Aruba lo mester mehora. Y ta akinan nos a bisa cu si Aruba no ta preocupa pa esaki, anto nos di Arubahuis tin un tarea pa informa e studiante riba e tereno aki. Banda di duna informacion na e grupo di studiante cu ta cla pa bin Hulanda.’

   Minister Besaril a bisa cu e decision di James pa scohe pa un otro trabao no a sorprese. ‘Si e momento tabata un sorpresa, pero no e deseo. Mi por a imagina mi mes cu ta bay yega e momento cu James lo bisa mi a haci e trabao aki pa tanto aña y a yega e tempo pa habri mi halanan. Lo mi a desea pa James a keda net un tempo mas. Pero den bida loke ami a siña ta cu e trein ta pasa un biaha so e station y ta haci cu bo ta para pa tuma decisionnan grandi den e rumbo cu bo mester tuma den bida,’ asina Minister Besaril bisa.

   Na final sr. Besaril a gradici James cu su añanan di servicio na Arubahuis y a desea James tur clase di exito den e reto nobo na Erasmus MC.

   Despues a pasa pa haci entrega di un regalo di parti di Arubahuis na James y un boeket di flor na su señora Karin. Tambe tabata tin algun mentor cu un regalo individual pa James, banda e e regalo general cu nan a entrega James durante di e ultimo reunion cu mentoren na december aña pasa. Asinaki e oportunidad a yega pa James hiba palabra na unda el a elabora riba su trayectoria di studiante cu a bay traha na Aruba y pa gobierno di Aruba y awor a tuma e decision pa sigui den un otro rumbo.

   ‘E gratitud pa Arubahuis y tur colega ta hopi grandi y na minister Besaril pa e oportunidad y confianza. Semper mi a traha na e bienestar general y di nos studiantenan. Nos a pasa den hopi cos e ultimo cuater añanan, pero ora cu nos a kere cu nos tin tur cos “riba rails”, corona a bin y bruha tur cos. Nos a haya nos ta traha dia y anochi; “learning on the job” con pa atende cu tur e retonan. E sosten cu mi a haya dimi coleganan, mentornan ta impagabel. Boso compromiso, boso curazon pa e trabao y boso amor pa haci loke ta coreco a un inspiracion. Mi punto den esaki ta cu nos tin hopi potencial na departamento di enseñansa di Arubahuis. Aki den tin e conocimento, aki den tin e experticio y experencia. Mi ta spera cu esaki keda reconoci. Si mi wak na mi team, mi ta hopi orguyoso cu loke nos a bin ta haci e ultimo cuater pa cinco añanan. Kico esaki ta nifica pa e interes general di nos lugar y pa e studiante. Laga esey ta nos motivacion pa sigui cu e trabao,’ asina James van der Linde a termina su discurso.

   E potretnan ta cortesia di Arubahuis.