Cada bez mas Caya Grandi ta birando un “Ciudad Fantasma”

ORANJESTAD (AAN) -- Ora bo cana na pia for di e parada di bus te e botica situa na final di caya grandi,

y ora bo cana bek te e parada di bus, ta un soledad inmenso ta e sentimento cu ta gara bo.

Si. Un ciudad fantasma!

            Apenas por mira, di mainta te ora comercio ta cera, algun hende sinta den e bankinan bao di mata cu a pone a lo largo di Caya Grandi. Movecion di hende cumprando den tienda, practicamente no tin, ni awo cu ta temporada di “back to school”. Tampoco ta mira, manera ainda un tres aña atras, borchinan den varios tienda cu oferta riba tas escolar, flanel, jeans y keds, pa mucha y adolescente. E dianan aki ni esey tin! Por mira cuanto tienda a cera nan porta. Personanan cu no a bolbe cana den Caya y pa un of otro motibo, incluyendo curiosidad di loke nan por a scucha di otronan, enberdad ta keda desapunta pasobra varios tienda cu antes tabata bon bishita, a cera nan y ta un tienda tradicional so tin cu ainda ta hala rosea. Den e otro tiendanan no ta mira un variedad di producto cu por capta atencion di e consumidor, tur ta ofrece mescos, y esaki ta algo cu tabata existi caba y cu nunca a cambia ni lo bay cambia.

No ta mira un incentivo ni pa turistanan, cu ta djis core den tram, baha pose pa potret, bolbe subi tram pa bay bek, y “that’s all”.

            Tin aki aya, un par di lugar pa drenta dal un coffie y come algo, pero un ambiente cu por seduci consumidornan, no tin. Un Caya Grandi cu a wordo drecha masha bunita mes, pero sin movecion. Un ciudadano cu DIARIO a acerca, ora a bay cana wak cu su mes wowo loke algun hende ta describi, a bisa cu un di e problemanan grandi ta cu no tin lugar pa staciona auto. Tin hasta confusion pasobra ora e purba busca un lugar pa para su auto, ata tin hende ta haya su atencion, pasobra e ta coriendo contra via, pero no tin un indicacion cu e trafico eybanda a cambia di direccion. Esaki ta kizas e problema number uno.

            Otro situacion ta cu diferente tienda cu tabata tin den caya a dicidi di muda pafo di e ciudad. Pafo di ciudad, tur hende sa, e trafico ta hopi druk y pa haya un stacionamento tambe mester pasa den un caminda di Cruz, pero esaki ta debi cu tin movecion di cliente pa e tiendanan ey.

            Pues, den Caya Grandi fuera di e dos boticanan cu tin den Caya y cu ta sigui duna e comunidad servicio, no tin mucho cos pa busca. Por corda ora cu Caya Grandi tabata den su apogeo, prome por cierto cu el a wordo renova, ora aña escolar cera yen di grupo di hoben tabata cana hunto, tabata drenta cualkier snack of lugar di ijs cream  eybanda, y tabata sembra e semia di alegria di hubentud den Caya. Adultonan tabata gusta wak esaki. Autonan tabata core den Caya y con cu bay bin, consumidornan tabata staciona un caminda y bin Caya haci compra. Esnan cu tabata gusta e ambiente aki ta bisa cu awo Caya Grandi a bira un “ciudad fantasma”!