Cachonan salvahe di Dump ta causando hopi molester pa bisiñanan di bario

ORANJESTAD (AAN): “Nos no por mas!  E cachonan salvahe cu ta biba riba Dump a bira asina hopi y nada ta worde haci.

Nos ta laga publica e keho aki cu potretnan como prueba pa gobierno y tur hende sa den kico nos ta pasa aden tur dia.”

   Esey ta reclamo cu habitantenan ta transmitiendo e siman aki!  “Nos yiunan no por cana drechi mas pafor atardi, nan no por core bicicleta sin worde intimida. Ora cu bo tin cu bay tienda di bario, bo mester cana cu un pida palo of tubo pa cuida bo mes. Hasta si bo bay cu auto ora cu bo baha for di auto nan ta eyfo ta wardabo.”

   Segun e habitantenan, ora cu Gobierno nobo a sinta, nan a tende cu tin un plan.  “Nos ta pidiendo urgentemente pa bin cu e Plan aki. E culpa no ta di nos, ta di e Gobiernonan cu a neglisha e Dump, pasobra cu e Dump a bira un criadero di bestia, hende ta bin tira cacho cu pushi eyriba y no tin cura drechi, e ta tur kibra na werki. E trahadornan di Serlimar y Gobierno no ta haci nada tampoco.”

    Nan ta bisa cu ta Gobierno su responsabilidad pa piki e cachonan y hibanan un caminda pa nan haya doño, esey no ta tarea di e habitantenan di e barionan.

   “Mi casa den weekend a purba core cu algun di nan cu nan a drenta cura, mas laat nan a bin back nos cas y para pafo y blaf, ta manera cu nan a bin back pa regla cuenta, boso por imagina boso mes e cos aki?”  Esey ta loke un di e habitantenan a indica na DIARIO.

   “E cachonan aki ta bringa cu nan mes y nan ta bringa cu e cacho y pushinan di casnan di famia di bario pa haya cuminda. Nan ta bestianan salvahe y peligroso pa comunidad. Aña pasa nan a morde un mucha masha mahos mes den bario y no ta prome biaha.”

   Nan a finaliza bisando: “Nos ta pidi City Inspector y Gobierno por fabor bin atende cu problema aki mas pronto posibel y pone un cura rond di e Dump, nos ta harta cu e holor malo y e cachonan salvahe.”