Parlamentario Alvin Molina (MEP):
ORANJESTAD (AAN): Siman pasa a ricibi un bon noticia pa nos pensionadonan. Minister Dangui Oduber a anuncia cu entrante 1 januari 2023 pensioen lo subi cu 3% y durante aña e por subi cu algo mas. Un husticia pa nos pensionadonan. Esaki ta posibel awo cu economia di Aruba poco poco ta recuperando, danki na maneho di Gobierno y esfuersonan di sector priva.
Desde algun siman caba partido MEP ta haciendo un bunita esfuerso pa yuda specialmente pensionadonan pa por cumpli cu nan deber di impuesto. Impuesto ta algo necesario pa Gobierno por provee cualkier servicio na pueblo. Combersando cu pensionadonan, esnan cu ta yuda yena e formulario y expertonan, aparentemente tin algo den ley di impuesto cu no ta sinti husto.
Ora tin un pareha casa y tur dos ta traha, nan entrada/salario ta wordo ‘belast’ separa. Ora un ta baha cu pensioen mientras cu e otro ta trahando ainda, e suma di e pensioen ta wordo conta riba e salario di esun cu ta trahando ainda. Resultado di esaki ta cu e pareha ta paga mas belasting compara cu prome cu un a bay cu pensioen, tin biaha miles di florin mas, casi mita di loke ta ricibi na pensioen mester paga bek.
Departamento di Impuesto ta haci un bon esfuerso di yuda e pensionadonan cu un ‘betalingsregeling’, pero e siguiente aña atrobe lo tin e mesun debe/suma ey ta bin extra riba dje, te ora ambos persona baha cu pensioen. Imaginabo nan tin un diferencia di edad di 3,5 of 10 aña.
Hasta tin pareha ta bay asina leu di divorcia pasobra nan no por cumpli cu nan deber di impuesto. No por ta intencion cu nos ta promove bida familiar, bida social, pa despues, ora hendenan bira grandi, bay cu pensioen, nan ta haya nan mes obligatorio den un divorcio pa motibonan financiero.
Departamento di Impuesto ta haciendo su trabou mane debe ser, manera ley ta prescribi. Pero den e caso aki e no ta sinti husto. Mester busca pa haya sa kico ta e motibo cu e ley ta asina y si e motibonan ey ta conta ainda. Pesey lo trece esaki dilanti cerca mi coleganan den Parlamento y tambe cerca gobernantenan concerni, pa asina e pensionadonan mas ainda por gosa di e aumentonan di pensioen premira pa otro aña.
