Buskeda grandi pabao di Aruba pa cuatro piscado perdi

Yate Energy a ‘desaparece’ riba Diasabra atardi

ORANJESTAD (AAN): E yate Energy cu motor di Diesel, ta uno di 42 pia largo, color blanco di marca Bertram, cu pa hopi tempo a sa di carga tripulantenan pa viahe di placer of di pesca, y semper na final ta debolbe tur hende sano y salvo bek pa tera.  E ta registra na Aruba y su matricula ta A-30.

   Diasabra mainta e yate aki a sali for di Surfside Marina cu intencion di regresa atardi.  Sinembargo algo a bay malo riba Diasabra ora cu nan a bay pisca riba lama na basta miya nautico West-Noordwest for di Arashi Beach.

   Nomber di esnan abordo:  Abordo di e yate Energy, tin Jarred Croes, Aischell Tromp, Marcelo Heyden, y Davey Croes.  Cada uno cu hopi experiencia, y nan ta alavez tata di famia hopi stima pa monton di amigo cu nan tin.

   E plan ta semper nan ta regresa atardi despues di pisca, pero prome cu solo baha. Si acaso e pesca ta bayendo bon e dia ey, nan lo keda djis un tiki extra riba lama pa finaliza nan dia cu suerte.  Pesey ora cu nan no a regresa na e ora stipula, no a haya esaki nada inusual.

   Pero ora cu tabata birando mas laat, famia no a haya ningun yamada ni notificacion cu nan a yega bek tera.  Pues basta laat riba Diasabra a dicidi na bati alarma na autoridad local.

   Relato di Wardacosta: Nan ta confirma cu ta te Diadomingo marduga (ya a bira 13 di Juli), cu Centro MOC (Maritieme Operatie Centrum) di Wardacosta di Caribe Hulandes, a ricibi un notificacion relaciona cu e yate perdi riba lama.

   Wardacosta a ricibi informacion cu e yate Energy a sali di Diasabra mainta for di Aruba, cu intencion di regresa Diasabra atardi prome cu solo baha.  Un total di 4 piscado local ta abordo di e boto.

   For di marduga mes caba cu Wardacosta a ser notifica, nan a saca un unidad di boto di reaccion rapido Metal Shark pa subi lama y bay core den e area Noordwest di Aruba.  Tambe a laga e helicopter di Wardacosta lanta vuelo for di Aeropuerto di Hato na Curaçao.  Tambe a laga e avion Dash-8 di Wardacosta lanta vuelo.  E avion aki tin aparatonan extremadamente sofistica cu por detecta obheto den total scuridad.  Sinembargo toch e marduga aki tabatin cielo basta cla cu luna ta briya.

   Personal di Centro MOC di Wardacosta tambe a manda un mensahe riba canalnan di Marine VHF Radio, pidiendo tur boto den bisindario pa ta na altura di e situacion y pa posiblemente yuda busca.

    Ora cu solo a sali, keto bay Avion y Helicopter tabata yuda busca.  Nan tabata stop djis pa refuel, y despues bolbe sigui busca segun un patronchi standard cu ta yuda nan localiza obheto of ser humano mas facil.  A sigui haci esaki for di mainta te cu merdia y a nan sigui cu e buskeda henter atardi te despues cu solo a baha.

   Yamada sin sonido: A bin sali na cla, cu un yamada a drenta si na e number di emergencia di Wardacosta di Caribe Hulandes, procedente di un di e personanan cu ta riba e boto, pero e operator na Wardacosta no por a tende nada.  Aki e teoria ta cu e persona cu a yama lo ta den lama, sea awa a drenta den e mic, of e sistema di señal di GSM ta wordo distorciona unavez cu e aparato ta na nivel di awa.

   Peticion a wordo haci na Setar NV tambe, pa check si nan por triangula e señal di e celularnan aki, pues e ‘ping’ regular di e celular.  Trahadornan di Setar NV a bay oficina riba Diadomingo, pa asina haci triangulation riba e number di telefon, pa asina por pone riba un mapa un posicion mas o menos di unda e celular ta comunicando cu e Cell-sites Toren den area Noordwest di Aruba.

   E buskeda a tuma luga basta leu for di tera. Esaki a tuma luga den direccion West-Noordwest for di Faro di California na Aruba. Tambe a tuma nota cu un cantidad di boto local a sali pa yuda.

   Dialuna a sigui: Varios amigo di esnan perdi, riba Dialuna mainta trempan a yena tanki di nan boto cu combustibel, y a sali bek rumbo pa lama pa continua cu e buskeda.  Esaki a wordo haci door di personal di Wardacosta di Caribe Hulandes tambe.

   Pensando cu mas di 24 ora a pasa, e shift a bay e ora mas pabao y leu di Aruba.  Como cu ta drentando awa teritorial di otro pais, a contact autoridad maritimo di Venezuela, y tambe Armada di Colombia a ser notifica.

   Pronostico no ta disponibel: Ministro di Husticia Arthur Dowers tambe a mustra interes den esaki, y a priminti extra yudanza di tur forza local pa coordina buskeda di e personanan aki, y esey por lesa den un articulo awe den DIARIO.

   Prome Ministro Mike Eman a acudi na sede di Wardacosta su seccion Aruba na Marinierskazerne pa haya e ultimo update di nan buskeda.