Alarma di expertonan pa evita cualkier riesgo pa futuro insigur
*Inseguridad riba salida real di petroleo ta mas confusion mundial
*Gremio comercial mester por crea reserva cu guia experto
ORANJESTAD (AAN) — Mientras na Aruba e temporada di vacacion escolar ta crea e situacion anual acostumbra, mundo ta keda den gara di problemanan serio, cu manera expertonan cu insistencia ta exigi pa haya mas atencion.
Desaroyonan di dialuna na nivel mundial segun informantenan clave ta exigi pa gremionan di Aruba wordo informa di e proyeccionnan actual pa Aruba pa confronta un situacion mundial sumamente serio, cu cualkier momento sin anuncio, por presenta su mes.
“Ta normal cu vacacion pa Miembronan di Parlamento ta encera cu nan ta keda den estado di alerta y pa cualkier situacion importante por reuni imediatamente pa atende cu desaroyonan di preocupacion. Sinembargo, na 2025 e situacion mundial actual na inicio di temporada di vacacion ta contene un margen di riesgo di problema serio riba diferente tereno asina halto, cu dirigentenan di e pais mester ta den estado halto di alerta pa cualkier problema cu por presenta y por exigi accion.”
Manera ya a wordo indica, Aruba ta depende di turismo pa su economia, cu ta sigui confronta situacionnan serio cu ta afecta e resultadonan pa e pais loke ta encera cu e negoshinan cu ta atende cu turismo, mester sigui paga gastonan enorme mientras mester tene cuenta cu cualkier impacto mundial, por afecta entrada na forma serio.
“Aruba como pais na e momentonan aki, mester posiciona su mes sumamente fuerte ya cu como isla Aruba cu un economia vulnerabel, Aruba sigur mester ta preparando su mes pa cualkier desaroyo mundial negativo, sigur si tene na cuenta cu Reino ta mara su mes na compromisonan den cual e advertencia cu mas asistencia pa Aruba, mester wordo lubida,”e advertencia a bisa ayera.
Cu mundo mes no sa ki direccion e ta bayendo, a bini dilanti ayera riba tereno internacional den e ramo di petroleo, cu ta uno di e indicadornan mas importante na nivel economico mundial.
Prijs di petroleo a bolbe baha y asina ta sigui afecta negoshinan rond mundo cu ta depende di entrada di petroleo, mientras na mes momento alarma a wordo bati pa e hecho, cu na nivel internacional mester bandona e maneho cu a wordo fiha pa produccion petrolero, cu lo continua despues di 2050, ora ainda petroleo lo mester fungi como 30 porciento di e total di energia cu mundo mester pa por funciona.
Esaki ta nifica cu mundo mester inverti mas cu 18 Trillion di Dollar na produccion di gas y petroleo prome cu 2050 pa asina asegura e cantidad di combustibel necesario.
Inversionnan pisa mester wordo haci den e proximo temponan dilanti porta pa garantisa funcionamento basico di mundo, manera a bini dilanti den informacionnan.
Mientrastanto instabilidad mundial cu ta afecta e sentido di paz cu ta asina importante pa un funcionamento di e comunidad y mundo di negoshi di mundo, a sigui crece ayera na momento cu amenaza tras amenaza di culminacion tabata wordo lanza.
Presidente Donald Trump a bay di acuerdo pa entrega armanan pisa na Ukraine manera a bini dilanti den su encuentro cu Mark Rutte, Secretario General di NATO.
Na mes momento Russia a haya un advertencia cu Merca lo tuma medidanan contra Rusia y lo impone tarifanan enorme ariba paisnan cu haci negoshi cu Rusia, si dentro di 50 dia, no yega un fin na e encuentronan arma na Ukraina.
Na e momentonan aki e benta di arma ta keda e negoshi grandi di mundo y Hulanda tambe lo mester duna un aporte total, loke tin peso sigur pa e posicion Hulandes pa cera porta pa mas asistencia financiero na Aruba.
Ademas di e problemanan di guera, DIARIO a wordo informa di necesidadnan serio cu mundo politico Hulandes mester cubri pa comunidad Hulandes cu mester bay urna electoral proximamente.
Hulanda sigur na e momentonan aki lo tene su mes na e palabracionnan cu Aruba, cu ariba su mes mester garantisa un bon maneho financiero den cual ta crea reservanan pa situacionnan pisa cu ainda por presenta.
Un maneho financiero sumamente cuidadoso mester wordo hiba cu placa di Pueblo ya cu cualkier necesidad adicional pa placa di parti di Pueblo di Aruba, lo no por conta sin mas cu asistencia Hulandes.
DIARIO ta den contacto cu tur su expertonan internacional den un situacion mundial sumamente serio, pa cual Aruba mester wordo prepara cu informacion debido na Parlamento y poblacion di Aruba.
“Sostenibilidad propio di Aruba, ta bira e reto mas importante di e pais, den un situacion mundial cu lo baha e produccion nacional di Aruba y asina sigui afecta turismo y crea un avalancha social,”informantenan a declara.
Den esaki pues no solamente mester baha gasto, pero mester tuma pasonan cu economia ta exigi como productor di e placa necesario pa epais funciona.
Pueblo mester ta na haltura di tur medida pero tambe di pasonan cu ta wordo tuma pa hunto cu comercio reanima Pueblo pa sigur den e tempo di vacacion haci inversionnan local, pues haci compranan local, pa asina negoshi Arubano por haya ingreso cu mester permiti creacion di reserva tambe pa cualkier eventualidad.
E forza economico di Aruba pa confronta problemanan, mester wordo bon analisa y si ta necesario gruponan di trabou mester wordo institui ariba elementronan importante, riba cual DIARIO den su proximo edicionnan lo sigui elabora.
Na e momentonan aki ta bira importante pa den Comercio bira posibel con por crea reservanan pa loke mester wordo importa y por wordo confronta cu prijs internacional mas halto pero tambe problema pa entrega ariba cual DIARIO lo sigui amplia tambe.
