ORANJESTAD (AAN): Apenas un dia despues di a huramenta dilanti Gobernador, Minister di Infrastructura, Energia y Medio Ambiente, Gervais Rene Herdé,
a asisti na e ultimo Conseho di Minister prome cu bay cu reces.
Despues di 35 aña trahando den politica na Aruba, "Baba" Herdé a forma parti pa prome biaha di Conseho di Minister y ta trece un cantidad di experencia na mesa. E experencia amplio como ex parlamentario pa fraccion di AVP riba un cantidad di tereno, lo sirbi como guia pa Minister Herdé.
Den pasado Herdé tabata forma parti di ekipo di varios minister, pero nunca a tuma decision ehecutivo cu por impacta bida di hende. Formando parti awo di e conseho di minister, Minister Herdé ta sinti e peso di e responsabilidad, awo cu tin cu atende cu cosnan personal di personanan cu ta depende di e decision di un of mas minister pa bienestar general y di ambtenaar, pero tambe riba maneho general di su ministerio, manera e maneho di infrastructura of energia. Minister Herdé a expresa su sentido di respet pa tur esnan den funcion como minister pero tambe esnan cu den pasado a carga e peso di responsabilidad aki.
Como ex-parlamentario, Sr. Herdé, a haya conocemento amplio riba e maneho energetico, di infrastructura y medio ambiente, locual tabata un maneho bon defini pa e gobierno di AVP den pasado. Minister Herdé a subraya si cu e ta compronde e materia bon y tin conocemento amplio, pero cu esaki no ta hacie un experto at all riba e terenonan aki, pero ta sigura cu lo busca conseho di expertonan specialisa riba e diferente materianan aki.
Segun Minister Herdé, Aruba a perde shete aña di transicion for di energia fosil pa energia renobabel, y awo mester haal in e perdida aki mirando cu henter mundo ta mirando e importancia pa transiciona den energia limpi. E uzo convencional di energia fosil den transcurso di decadanan a resulta devastador pa nos medio ambiente y tin su efecto riba economia mundial y bienestar di cada hende, y esaki ta e motibo cu e transicion ta asina importante. Aruba tin e medionan pa por transiciona den energia duradero di manera facil. Locual tin na plan cla y hunto cu e experticio di esnan cu a traha e plan aki, manera ingeniero Mike de Meza y su ekipo, lo cuminsa cu ehecucion di e maneho nobo. "Awo no tin tempo mas pa planea, e plannan tey y awo ta ehecuta", Minister Herdé a finalisa.
